ជនប៉ាឡេស្ទីនរាប់រយនាក់ ក្នុងទីក្រុង Beit Lahiya ស្ថិតនៅភាគខាងជើងតំបន់ហ្កាហ្សាស្រ្ទីប សង្ឃឹមថា ពួគគេនឹងដណ្តើមបានបាវម៉្សៅ ឬជំនួយមួយចំនួន ស្របពេលស្ថានភាពមនុស្សធម៌កាន់តែអាក្រក់ខ្លាំង ។

ក្រុមអ្នកតាមដានភាពអត់ឃ្លានសកល(IPC) និយាយកាលពីថ្ងៃអង្គារថា សេណារីយោគ្រោះទុរ្ភិក្ស បានលេចចេញជារូបរាងឡើង ហើយស្ថានភាពមនុស្សធម៌កាន់តែធ្ងន់ធ្ងរខ្លាំង ។

ការប្រកាសអាសន្នដោយក្រុមតាមដាន IPC លើកឡើងពីការរំពឹងទុកថា វិបត្តិអត់ឃ្លានបង្កឡើងដោយមនុស្សនៅតំបន់ហ្កាហ្សា អាចនឹងចាត់ទុកថាជាគ្រោះទុរ្ភិក្ស ដោយពួកគេសង្ឃឹមថា ការលើកឡើងបែបនេះ នឹងដាក់សំពាធអ៊ីស្រាអែលអនុញ្ញាតឲ្យជំនួយចូលបន្ថែមទៀត ។

ដោយសំពាធអន្តរជាតិកើនឡើងជុំវិញវិបត្តិអត់ឃ្លាននៅតំបន់ហ្កាហ្សា អ៊ីស្រាអែល បានប្រកាសជំហានកាលពីចុងសប្តាហ៍កន្លងទៅ ដើម្បីបន្ធូរបន្ថយការចូលជំនួយ ។

ទោះបីជាយ៉ាងណាក៏ដោយ កម្មវិធីស្បៀងអាហារពិភពលោករបស់អង្គការសហប្រជាជាតិ(UN) និយាយថា ពួកគេពុំទទួលបានការអនុញ្ញាតឲ្យចែកចាយជំនួយគ្រប់គ្រាន់នោះឡើយ ចាប់តាំងពីអ៊ីស្រាអែលចាប់ផ្តើមផ្អាកការប្រយុទ្ធក្នុងបុព្វហេតុមនុស្សធម៌កាលពីថ្ងៃអាទិត្យ ។

ក្រុមអាជ្ញាធរសុខភាពហ្កាហ្សា បានរាយការណ៍ពីមនុស្សស្លាប់កាន់តែច្រើន ដោយសារមូលហេតុពាក់ព័ន្ធនឹងភាពអត់ឃ្លាន ។ មនុស្សសរុប ១៤៧នាក់ រួមទាំងកុមារ ៨៨នាក់ បានស្លាប់ដោយសារភាពអត់ឃ្លានក្នុងរយៈពេលប៉ុន្មានសប្តាហ៍កន្លងមកនេះ ៕