ប្រមុខការទូតបារាំង បាននិយាយនៅថ្ងៃពុធនេះថា ប្រទេសបារាំង និងប្រទេសលោកខាងលិចចំនួន ១៤ ផ្សេងទៀត បានអំពាវនាវឲ្យប្រទេសជុំវិញពិភពលោក សម្រេចទទួលស្គាល់រដ្ឋប៉ាឡេស្ទីន។

រដ្ឋមន្ត្រីការបរទេសនៃប្រទេសចំនួន ១៥ កាលពីល្ងាចថ្ងៃអង្គារ បានចេញសេចក្តីថ្លែងការណ៍រួមមួយ បន្ទាប់ពីសន្និសីទនៅទីក្រុងញូវយ៉ក ដែលត្រូវបានធ្វើសហប្រធានដោយបារាំង និងអារ៉ាប៊ីសាអ៊ូឌីត ក្នុងគោលបំណងស្តារឡើងវិញនូវដំណោះស្រាយរដ្ឋពីររវាងអ៊ីស្រាអែល និងប៉ាឡេស្ទីន។

រដ្ឋមន្ត្រីការបរទេសបារាំង លោក Jean-Noel Barrot បានសរសេរនៅលើបណ្តាញសង្គម X ថា៖«នៅទីក្រុងញូវយ៉ក រួមជាមួយនឹងប្រទេសចំនួន ១៤ ផ្សេងទៀត ប្រទេសបារាំង កំពុងចេញសេចក្តីអំពាវនាវរួមមួយថា យើងបង្ហាញពីបំណងប្រាថ្នារបស់យើង ក្នុងការទទួលស្គាល់រដ្ឋប៉ាឡេស្ទីន ហើយស្នើអ្នកដែលមិនទាន់បានធ្វើដូច្នេះ មកចូលរួមជាមួយយើងទាំងអស់គ្នា» ។

លោកប្រធានាធិបតី អេម៉ានុយអែល ម៉ាក្រុង ( Emmanuel Macron) បានប្រកាសកាលពីសប្តាហ៍មុនថា លោកនឹងទទួលស្គាល់ជាផ្លូវការនូវភាពជារដ្ឋរបស់ប៉ាឡេស្ទីន ក្នុងខែកញ្ញា ដោយបង្កឲ្យមានការប្រឆាំងយ៉ាងខ្លាំងពីអ៊ីស្រាអែល និងសហរដ្ឋអាមេរិក។

ប្រទេសបារាំងសង្ឃឹមថា នឹងបង្កើនការជំរុញជុំវិញការទទួលស្គាល់ជាផ្លូវការនូវរដ្ឋប៉ាឡេស្ទីន។