នៅថ្ងៃពុធនេះ រថយន្តរាប់សិបគ្រឿងដឹកជំនួយឆ្ពោះទៅកាន់តំបន់ហ្កាហ្សា បានធ្វើដំណើរចេញពីប្រទេសអេហ្ស៊ីប សម្រាប់រយៈពេល ៤ថ្ងៃជាប់ៗគ្នា ក្រោយអ៊ីស្រាអែលបន្ធូរបន្ថយការបិទច្រកលើដែនដីប៉ាឡេស្ទីនមួយនេះ ។

កាលពីថ្ងៃអាទិត្យកន្លងទៅ អ៊ីស្រាអែលបានប្រកាសបញ្ឈប់ប្រតិបត្តិការសឹកសម្រាប់រយៈពេល ១០ម៉ោងក្នុង ១ថ្ងៃ នៅតាមតំបន់មួយចំនួនរបស់ហ្កាហ្សា ហើយនិងបើកច្រករបៀងជំនួយថ្មី ស្របពេលដែលប្រទេសហ៊្សកដានី និងប្រទេសអារ៉ាប់រួម ទម្លាក់គ្រឿងផ្គត់ផ្គង់ជំនួយពីលើអាកាសចូលទៅក្នុងដែនដីបិទច្រកមួយនេះ ជាទីដែលរូបភាពនៃការអត់ឃ្លានរបស់ជនប៉ាឡេស្ទីន បានប្រកាសអាសន្នដល់ពិភពលោក ។

ក្រុមអ្នកតាមដានភាពអត់ឃ្លានសកល(IPC) និយាយកាលពីថ្ងៃអង្គារថា សេណារីយោគ្រោះទុរ្ភិក្ស បានលេចចេញជារូបរាងឡើង ហើយស្ថានភាពមនុស្សធម៌កាន់តែធ្ងន់ធ្ងរខ្លាំង ។

ការប្រកាសអាសន្នដោយក្រុមតាមដាន IPC លើកឡើងពីការរំពឹងទុកថា វិបត្តិអត់ឃ្លានបង្កឡើងដោយមនុស្សនៅតំបន់ហ្កាហ្សា អាចនឹងចាត់ទុកថាជាគ្រោះទុរ្ភិក្ស ដោយពួកគេសង្ឃឹមថា ការលើកឡើងបែបនេះ នឹងដាក់សំពាធអ៊ីស្រាអែលអនុញ្ញាតឲ្យជំនួយចូលបន្ថែមទៀត ។

 រូបភាពកុមារប៉ាឡេស្ទីនស្លេកស្លាំង បានធ្វើឲ្យពិភពលោករន្ធត់ចិត្តជាខ្លាំង ក្នុងនោះប្រធានាធិបតីសហរដ្ឋអាមេរិកដែលជាសម្ព័ន្ធមិត្តដ៏សំខាន់របស់អ៊ីស្រាអែលលោក Donald Trump បានប្រកាសថា មនុស្សជាច្រើន បានអត់ឃ្លាន ។ លោកបានសន្យាបង្កើតមជ្ឈមណ្ឌលស្បៀងអាហារថ្មីផងដែរ ៕