អាជ្ញាធរក្នុងតំបន់ នៅដែនដី Polynesia របស់ប្រទេសបារាំង បានចេញការព្រមាន អំពីរលកយក្សស៊ូណាមិ សម្រាប់ ប្រជុំកោះ Marquesas ដោយរលកកម្ពស់ពី ១,១០ ទៅ ២,២០ម៉ែត្រ ត្រូវបានរំពឹងថា នឹងកើតមាននៅកោះ Ua Huka, Nuku Hiva និង Hiva Oa នាពេលយប់ ចាប់ពីថ្ងៃអង្គារ (ទី២៩ ខែកក្កដា) ដល់ថ្ងៃពុធ (ទី៣០ ខែកក្កដា) នេះ។

ការព្រមាននេះធ្វើឡើងបន្ទាប់ពីមានរញ្ជួយដីកម្រិត ៨,៨រ៉ិចទ័រ ដែលបានកើតឡើងនៅឧបទ្វីប Kamchatka ភាគខាងកើតនៃប្រទេសរុស្ស៊ី។ អ្នកស្រុកត្រូវបានជំរុញឲ្យផ្លាស់ទៅទីទួលសុវត្ថិភាព និងអនុវត្តតាមការណែនាំផ្លូវការ ក្នុងនោះរួមទាំងការធានាឲ្យមានទូកត្រៀម ឬនាំពួកគេឲ្យទៅឆ្ងាយពីច្រាំង។

អាជ្ញាធរក្នុងតំបន់ បានប្រាប់ឲ្យដឹងទៀតថា ប្រជុំកោះផ្សេងទៀតនៅក្នុងដែនដី Polynesia របស់បារាំង អាចនឹងរងផលប៉ះពាល់ដោយរលកកម្ពស់មិនដល់ជាង ៣០សង់ទីម៉ែត្រ ដែលមិនតម្រូវឲ្យមានការជម្លៀស ឬទីជម្រកបណ្ដោះអាសន្នឡើយ។

ដែនដី Polynesia របស់បារាំង គ្របដណ្តប់លើផ្ទៃដី ៤.២០០គីឡូម៉ែត្រការ៉េនៃមហាសមុទ្រប៉ាស៊ីហ្វិក។ ដែនដីនេះមានកោះចំនួន ១១៨ ដែលត្រូវបានចែកជាប្រជុំកោះចំនួន ៥៕