ប្រទេសជប៉ុនបានឡើងកម្ដៅដល់កម្រិតខ្ពស់បំផុត ៤១,២អង្សាសេ នៅថ្ងៃពុធ (ទី៣០ ខែកក្កដា) នេះ ដោយសីតុណ្ហភាពក៏ឡើងខ្ពស់ផងដែរដល់ ៤០អង្សាសេ នៅក្នុងរដ្ឋធានីបុរាណក្យូតូ ជាលើកដំបូងគិតចាប់តាំងពីការអង្កេតបានចាប់ផ្តើមមាន។

សីតុណ្ហភាពនៅទូទាំងពិភពលោក បានឡើងខ្ពស់ក្នុងប៉ុន្មានឆ្នាំថ្មីៗនេះ ខណៈដែលបម្រែបម្រួលអាកាសធាតុបង្កើតគំរូអាកាសធាតុធ្ងន់ធ្ងរមិនអាចប៉ាន់ស្មានបាន ហើយប្រទេសជប៉ុនក៏គេចមិនផុតដែរ។

ការិយាល័យអាកាសធាតុបានឲ្យដឹងថា កំណត់ត្រាថ្មីនៅថ្ងៃទី៣០ ខែកក្កដានេះ នៅភាគខាងលិចតំបន់ Hyogo បានឡើងលើសកម្រិតខ្ពស់បំផុតកាលពីមុន ៤១,១អង្សាសេ ដែលបានកើតមាននៅទីក្រុង Hamamatsu ក្នុងឆ្នាំ២០២០ និងទីក្រុង Kumagaya ក្នុងឆ្នាំ២០១៨។

កម្ដៅឡើងខ្ពស់បំផុតនេះកើតមាននៅថ្ងៃដែលប្រទេសជប៉ុន ក៏ស្ថិតក្នុងការប្រុងប្រយ័ត្នខ្ពស់ផងដែរ ចំពោះរលកយក្សស៊ូណាមិ បន្ទាប់ពីមានរញ្ជួយដីកម្រិត ៨,៨រ៉ិចទ័រ នៅភាគខាងកើតប្រទេសរុស្ស៊ី។

អាជ្ញាធរបានឲ្យដឹងថា នៅតំបន់ទេសចរណ៍ដ៏ពេញនិយម Kyoto សីតុណ្ហភាពឡើងដល់ ៤០អង្សាសេ ដែលជាលើកទី១ នៅសា្ថនីយអង្កេតរបស់ខ្លួន ពោលគឺទោះបីស្ថានីយចាស់ ក្នុងឆ្នាំ១៨៨០ និងថ្មីបំផុត ក្នុងឆ្នាំ២០០២ ក៏មិនធ្លាប់បានជួបប្រទះកម្រិតខ្ពស់បែបនេះដែរ៕