អ្នកនាំពាក្យវិមានក្រឹមឡាំងលោក Dmitry Peskov និយាយថា រុស្ស៊ីបានអភិវឌ្ឍប្រព័ន្ធភាពស៊ាំប្រឆាំងនឹងទណ្ឌកម្ម សេដ្ឋកិច្ចរបស់ខ្លួនបានដើរអស់រយៈពេលជាយូរមកហើយក្រោមការរឹតត្បិតដ៏ច្រើន ។

លោក Peskov បាននិយាយប្រាប់ក្រុមអ្នកសារព័ត៌មានថា ពួកយើងបានរស់ក្រោមទណ្ឌកម្មដ៏ច្រើនអស់រយៈពេលជាយូរមកហើយ សេដ្ឋកិច្ចរបស់ពួកយើង ប្រតិបត្តិការក្រោមការរឹតត្បិតដ៏ច្រើន ដូច្នេះហើយពួកយើងបានអភិវឌ្ឍប្រព័ន្ធភាពស៊ាំប្រឆាំងជាមួយវា ។

លោកបន្តថា ទីក្រុងម៉ូស្គូបានកត់សម្គាល់សេចក្តីថ្លែងការណ៍ថ្មីរបស់ប្រធានាធិបតីសហរដ្ឋអាមេរិកលោកDonald Trumpពាក់ព័ន្ធនឹងការដោះស្រាយជម្លោះអ៊ុយក្រែន ហើយនិងលទ្ធភាពនៃការរឹតត្បិតលើរុស្ស៊ី ។

គួរឲ្យដឹងថា លោក Trumpនិយាយថា លោកនឹងដាក់ឱសានវាទថ្មីរយៈពេលត្រឹម ១០ថ្ងៃ ឬ ១២ថ្ងៃប៉ុណ្ណោះ ឲ្យរុស្ស៊ីបោះជំហានឆ្ពោះទៅរកការបញ្ចប់សង្រ្គាមអ៊ុយក្រែន ។

លោកTrump បញ្ជក់ថា លោកនឹងចាប់ផ្តើមចាត់វិធានការដាក់ទណ្ឌកម្មរុស្ស៊ី ក្នុងរយៈពេល ១០ថ្ងៃទៀត បើសិនជាទីក្រុងម៉ូស្គូ គ្មានវឌ្ឍនភាពឆ្ពោះទៅរកការបញ្ចប់សង្រ្គាមរបស់ខ្លួននៅអ៊ុយក្រែនទេនោះ ៕