នៅថ្ងៃពុធ (ទី៣០ ខែកក្កដា) នេះ ចក្រភពអង់គ្លេស បានច្រានចោលការរិះគន់ ដែលថា ខ្លួនផ្តល់រង្វាន់ដល់ក្រុមសកម្មប្រយុទ្ធហាម៉ាស ដោយដាក់ចេញផែនការទទួលស្គាល់រដ្ឋប៉ាឡេស្ទីន ប្រសិនបើអ៊ីស្រាអែលមិនចាត់វិធានការ ដើម្បីធ្វើឲ្យស្ថានភាពនៅតំបន់ហ្កាហ្សាប្រសើរឡើង និងនាំឲ្យមានសន្តិភាពទេនោះ។

ពិភពលោក បានតក់ស្លុត ក្នុងប៉ុន្មានថ្ងៃថ្មីៗនេះ បន្ទាប់ពីបានមើលឃើញកុមារនៅតំបន់ហ្កាហ្សាមានសភាពស្លេកស្លាំង ហើយកាលពីថ្ងៃអង្គារ (ទី២៩ ខែកក្កដា) អ្នកឃ្លាំមើលភាពអត់ឃ្លាន បានព្រមានថា ទិដ្ឋភាពគ្រោះទុរ្ភិក្សដ៏អាក្រក់បំផុត កំពុងកើតឡើងនៅទីនោះ ហើយចាំបាច់ត្រូវចាត់វិធានការជាបន្ទាន់ ដើម្បីបញ្ចៀសកុំឲ្យការស្លាប់មានកាន់តែច្រើនឡើង។

ការចេញឱសានវាទរបស់នាយករដ្ឋមន្ត្រីអង់គ្លេស លោក Keir Starmer ដោយកំណត់កាលកំណត់ខែកញ្ញា សម្រាប់អ៊ីស្រាអែលនោះ បានជំរុញឲ្យមានការស្តីបន្ទោសភ្លាមៗពីសមភាគីរបស់លោក នៅទីក្រុងហ្សេរុយសាឡឹម ដែលបានលើកឡើងថា ទីក្រុងឡុងដ្រ៍បានផ្តល់រង្វាន់ដល់ក្រុមហាម៉ាស និងដាក់ទណ្ឌកម្មដល់ជនរងគ្រោះនៃការវាយប្រហារឆ្លងព្រំដែនឆ្នាំ២០២៣ របស់ក្រុមនេះ។

ប្រធានាធិបតីអាមេរិក លោក Donald Trump បាននិយាយថា លោកមិនគិតថា ក្រុមហាម៉ាស «គួរតែត្រូវបានផ្តល់រង្វាន់» ដោយការទទួលស្គាល់ឯករាជ្យរបស់ប៉ាឡេស្ទីននោះឡើយ។

នៅពេលត្រូវបានសួរអំពីការរិះគន់នោះ រដ្ឋមន្ត្រីដឹកជញ្ជូនអង់គ្លេស លោកស្រី Heidi Alexander ដែលត្រូវបានតែងតាំងដោយរដ្ឋាភិបាល ដើម្បីឆ្លើយតបនឹងសំណួរនៅក្នុងបទសម្ភាសន៍ប្រព័ន្ធផ្សព្វផ្សាយជាបន្តបន្ទាប់ នៅថ្ងៃទី៣០ ខែកក្កដានេះ បានបញ្ជាក់ថា វាមិនមែនជាវិធីត្រឹមត្រូវ ក្នុងការកំណត់លក្ខណៈនៃផែនការរបស់ចក្រភពអង់គ្លេសនោះទេ។

លោកស្រីបានប្រាប់វិទ្យុ LBC ថា៖ «នេះមិនមែនជាការផ្ដល់រង្វាន់ដល់ក្រុមហាម៉ាសនោះទេ។ ក្រុមហាម៉ាស គឺជាអង្គការភេរវករដ៏អាក្រក់ ដែលបានប្រព្រឹត្តអំពើឃោរឃៅដ៏គួរឲ្យភ័យខ្លាច។ តែនេះគឺពាក់ព័ន្ធនឹងប្រជាជនប៉ាឡេស្ទីន»៕