អាជ្ញាធរនៅឧបទ្វីប Kamchatka ចុងភាគខាងកើតរបស់រុស្ស៊ី នៅថ្ងៃពុធ (ទី៣០ ខែកក្កដា) នេះ បានឲ្យដឹងថា ការព្រមានអំពីរលកយក្សស៊ូណាមិ ត្រូវបានដកចេញ ពោលគឺជាង ១១ម៉ោង បន្ទាប់ពីរញ្ជួយដីកម្រិត ៨,៨រ៉ិចទ័រ នៅជិតឆ្នេររបស់តំបន់នេះ បានជំរុញឲ្យមានការជម្លៀសចេញ។

លោក Sergei Lebedev រដ្ឋមន្ត្រីគ្រាអាសន្នរបស់តំបន់ បានឲ្យដឹងតាមរយៈបណ្ដាញសង្គមថា៖ «អ្នកស្រុក និងភ្ញៀវទេសចរណ៍ជាទីគោរព នៅតំបន់ Kamchatka សហការីរបស់យើងមកពីក្រសួងគ្រប់គ្រងគ្រាអាសន្នរបស់រដ្ឋ បានសម្រេចដកការព្រមានអំពីរលកយក្សស៊ូណាមិ»។

គួរបញ្ជាក់ថា គ្រោះរញ្ជួយដីកម្រិត ៨,៨រ៉ិចទ័រ បានវាយប្រហារលើឧបទ្វីប Kamchatka ភាគខាងកើតប្រទេសរុស្ស៊ី ក្នុងថ្ងៃពុធនេះ ដោយបង្កឲ្យមានរលកយក្សស៊ូណាមិ កម្ពស់រហូតដល់ទៅ ៤ម៉ែត្រ ដែលជំរុញឲ្យមានការជម្លៀសខ្លួន និងខូចខាតអគារនានា។ 

ជប៉ុន និងសហរដ្ឋអាមេរិក ក៏បានចេញការព្រមានអាសន្នពីរលកយក្សស៊ូណាមិ និងបញ្ជាជម្លៀសនៅថ្ងៃពុធនេះដែរ បន្ទាប់ពីមានគ្រោះរញ្ជួយដីនៅរុស្ស៊ី ខណៈដែលកន្លែងជាច្រើនទៀត ដូចជាកោះតៃវ៉ាន់ ហ្វីលីពីន ផ្នែកខ្លះនៃឥណ្ឌូនេស៊ី ម៉ិកស៊ិក ចិន និងប៉េរូ ហើយភាគច្រើននៃឆ្នេរខាងលិចរបស់អាមេរិក បន្តប្រកាសអាសន្ន និងជម្លៀស៕