ការិយាល័យរដ្ឋអាជ្ញាកំពូលរបស់កូរ៉េខាងត្បូង នៅថ្ងៃពុធ (ទី៣០ ខែកក្កដា) នេះ បានសម្រេចបើកក្រុមស៊ើបអង្កេតរួមមួយ ដែលមានតំណាងអយ្យការ និងនរគបាល ដើម្បីស៊ើបអង្កេតលើហេតុការណ៍ហ្វូងមនុស្សប្រជ្រៀតគ្នាស្លាប់ នៅសង្កាត់ Itaewon។

ការសម្រេចនេះបានកើតមានឡើងក្រោយ ២សប្តាហ៍បន្ទាប់ពីលោកប្រធានាធិបតី Lee Jae Myung បានសន្យាដល់ក្រុមគ្រួសារជនរងគ្រោះក្នុងសោកនាដកម្មនៅសង្កាត់ Itaewon នេះថា លោកនឹងបង្កើតក្រុមការងារដាច់ដោយឡែកមួយ ដើម្បីស៊ើបអង្កេតគ្រោះមហន្តរាយដែលបានឆក់យកជីវិតមនុស្ស ១៥៩នាក់ ក្នុងអំឡុងពេលពិធីបុណ្យ Halloween ក្នុងឆ្នាំ២០២២។

ក្រុមស៊ើបអង្កេតរួម ត្រូវបានកំណត់ ដើម្បីពិនិត្យមើលឡើងវិញនូវកាលៈទេសៈទាំងមូល ទាក់ទងនឹងឧបទ្ទវហេតុនេះ ក្នុងនោះរួមទាំងដើមហេតុ កិច្ចប្រឹងប្រែងជួយសង្គ្រោះ និងការឆ្លើយតបរបស់អាជ្ញាធរ ព្រមទាំងស៊ើបអង្កេតករណីបន្ថែម ពាក់ព័ន្ធនឹងការខូចខាតបន្ទាប់បន្សំផ្សេងទៀត ទាំងសម្រាប់អ្នកនៅរស់ និងគ្រួសារអ្នកស្លាប់។

យោងតាមសារព័ត៌មាន Yonhap News បានឲ្យដឹងថា បុគ្គលិកប្រហែល ២០នាក់ នឹងត្រូវបានចាត់តាំងចូលទៅក្នុងក្រុមស៊ើបអង្កេតនេះ។ ក្រុមនេះនឹងដឹកនាំដោយនាយកដ្ឋានកិច្ចការព្រហ្មទណ្ឌនៃការិយាល័យរដ្ឋអាជ្ញាកំពូល។

អ្នកនាំពាក្យការិយាល័យរដ្ឋអាជ្ញាកំពូល បានបញ្ជាក់ថា ចាំបាច់ត្រូវមានវិធានការហ្មត់ចត់ និងឆាប់រហ័ស ខណៈដែលជនរងគ្រោះ និងគ្រួសារសពបានឈឺចាប់ជាយូរមក៕