អ្នកនាំពាក្យវិមានក្រឹមឡាំង លោក Dmitry Peskov បាននិយាយថា មិនមានអ្នកស្លាប់នៅក្នុងប្រទេសរុស្ស៊ី បន្ទាប់ពីមានរញ្ជួយដីដ៏ធំ នៅឧបទ្វីប Kamchatka នាថ្ងៃពុធ (ទី៣០ ខែកក្កដា) នេះ ហើយលោកបានសរសើរដល់សំណង់អគាររឹងមាំ និងដំណើរការយ៉ាងរលូននៃប្រព័ន្ធប្រកាសអាសន្ន។

ទូរទស្សន៍រដ្ឋរុស្ស៊ីនៅថ្ងៃពុធ បានចាក់ផ្សាយវីដេអូនៃរលកយក្សស៊ូណាមិដែលកំពុងហូរកាត់ទីក្រុងឆ្នេរនៅចុងភាគខាងកើតនៃប្រទេស ដោយនាំយកអគារ និងកម្ទេចកម្ទីចូលទៅក្នុងសមុទ្រ។

គួរបញ្ជាក់ថា គ្រោះរញ្ជួយដីកម្រិត ៨,៨រ៉ិកទ័រ បានវាយប្រហារឆ្នេរនៃឧបទ្វីប Kamchatka ចុងភាគខាងកើតរបស់រុស្ស៊ីមុននេះ ដែលជំរុញឲ្យមានការជម្លៀស និងការព្រមានអំពីរលកយក្សស៊ូណាមិ នៅទូទាំងផ្នែកជាច្រើននៃឆ្នេរមហាសមុទ្រប៉ាស៊ីហ្វិក។

យោងតាមអាជ្ញាធរ បានឲ្យដឹងថា នៅក្នុងទីក្រុង Severo-Kurilsk នៃប្រទេសរុស្ស៊ី ដែលមានប្រជាជនប្រហែល ២.០០០នាក់ នៅចម្ងាយប្រហែល ៣៥០គីឡូម៉ែត្រ នៅភាគនិរតីនៃចំណុចកណ្តាលគ្រោះរញ្ជួយដីនោះ រលកយក្សស៊ូណាមិ បានវាយប្រហារតំបន់កំពង់ផែ និងបានជន់លិចរោងចក្រនេសាទ ក្នុងតំបន់នេះ។

យោងតាមអភិបាលក្រុង លោក Alexander Ovsyannikov បានឲ្យដឹងថា រលកដែលមានកម្ពស់ដល់ទៅ ៤ម៉ែត្រនៅក្នុងតំបន់ខ្លះ បានទៅដល់ទីប្រជុំជននៃវិមានសង្គ្រាមលោកលើកទី២ ចម្ងាយប្រហែល ៤០០ម៉ែត្រ ពីច្រាំងសមុទ្រ។ 

លោកបាននិយាយនៅក្នុងកិច្ចប្រជុំ ស្ដីពីវិបត្តិជាមួយមន្ត្រីនៅមុននេះថា៖ «មនុស្សគ្រប់គ្នាត្រូវបានជម្លៀសចេញ។ មានពេលគ្រប់គ្រាន់ពេញមួយម៉ោង។ ដូច្នេះមនុស្សគ្រប់គ្នាត្រូវបានជម្លៀស ប្រជាជនទាំងអស់ស្ថិតនៅក្នុងតំបន់សុវត្ថិភាព»។

អ្នកនាំពាក្យវិមានក្រឹមឡាំង លោក Peskov បានប្រាប់ថា «ប្រព័ន្ធព្រមានទាំងអស់» បានដំណើរការយ៉ាងត្រឹមត្រូវ ហើយលោកបានប្រាប់អ្នកសារព័ត៌មាន ក្នុងរួមទាំងសារព័ត៌ាមាន AFP ថា៖ «សូមអរព្រះគុណដល់ព្រះជាម្ចាស់។ មិនមានអ្នកបាត់បង់ជីវិតឡើយ»៕