លោកនាយករដ្ឋមន្ត្រី Mark Carney បាននិយាយថា ប្រទេសកាណាដា គ្រោងនឹងទទួលស្គាល់រដ្ឋប៉ាឡេស្ទីននៅក្នុងខែកញ្ញា ដោយក្លាយជាប្រទេសទីបីរបស់ក្រុមប្រទេស G7 ដែលធ្វើសេចក្ដីប្រកាសបែបនេះក្នុងរយៈពេលប៉ុន្មានថ្ងៃថ្មីៗនេះ។   លោក Carney បាននិយាយថា វិធានការនេះគឺអាស្រ័យលើកំណែទម្រង់លទ្ធិប្រជាធិបតេយ្យ រួមទាំងអាជ្ញាធរប៉ាឡេស្ទីនដែលនឹងរៀបចំការបោះឆ្នោតនៅឆ្នាំក្រោយដោយគ្មានក្រុមហាម៉ាស។

ការថ្លែងរបស់លោកធ្វើឡើងមួយថ្ងៃបន្ទាប់ពីចក្រភពអង់គ្លេស បានប្រកាសថាខ្លួននឹងទទួលស្គាល់រដ្ឋប៉ាឡេស្ទីនក្នុងខែកញ្ញា លុះត្រាតែអ៊ីស្រាអែល យល់ព្រមលើបទឈប់បាញ់ និងលក្ខខណ្ឌផ្សេងទៀត និងមួយសប្តាហ៍បន្ទាប់ពីប្រទេសបារាំងបានបង្ហាញផែនការស្រដៀងគ្នានេះ។   

ក្រសួងការបរទេសអ៊ីស្រាអែលបានច្រានចោលការប្រកាសរបស់កាណាដា ដោយហៅថាជារង្វាន់សម្រាប់ក្រុមហាម៉ាស។ ប្រទេសភាគច្រើន ១៤៧ ក្នុងចំណោមរដ្ឋសមាជិក១៩៣ របស់អង្គការសហប្រជាជាតិ ទទួលស្គាល់ជាផ្លូវការនូវរដ្ឋប៉ាឡេស្ទីន។   

លោក Carney បាននិយាយថា ប្រទេសកាណាដានឹងទទួលស្គាល់ជាផ្លូវការនូវរដ្ឋប៉ាឡេស្ទីននៅក្នុងមហាសន្និបាតអង្គការសហប្រជាជាតិនាពេលខាងមុខ។

ឯកអគ្គរដ្ឋទូត និងអ្នកការទូតកាណាដាជិត២០០នាក់ បានចុះហត្ថលេខាលើលិខិតមួយកាលពីថ្ងៃអង្គារអំពាវនាវឲ្យលោក Carneyទទួលស្គាល់រដ្ឋប៉ាឡេស្ទីន៕