ភ្នំពេញ ៖ រដ្ឋាភិបាលសាធារណរដ្ឋកូរ៉េ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ(កយកា-KOICA) បានផ្តល់ជំនួយសម្ភារៈបរិក្ខារវេសាស្រ្តសម្រាប់ប្រយុទ្ធប្រឆាំងនឹងជំងឺកូវីដ-១៩ ដល់ក្រសួងសុខាភិបាល នៃព្រះរាជាណាចក្រកម្ពុជា, នៅឃ្លាំងឱសថកណ្តាល ក្រសួងសុខាភិបាល រសៀលថ្ងៃទី១២ ខែមករា ឆ្នាំ២០២២នេះ។ 

​ក្នុងពិធីប្រគល់-ទទួលនេះ លោកជំទាវ វេជ្ជបណ្ឌិត យក់ សម្បតិ្ត រដ្ឋលេខាធិការ តំណាងឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជន សាធារណរដ្ឋកូរ៉េ ដែលតែងតែផ្តល់នូវការគាំទ្រទាំងបច្ចេកទេស ក៏ដូចជាថវិកា ក្នុងការជួយដល់វិស័យសុខាភិបាលនៅកម្ពុជា ដូចជាការបណ្តុះបណ្តាលធនធានមនុស្ស ការកសាងហេដ្ឋារចនាសម្ព័ន្ធសុខាភិបាល ការផ្គត់ផ្គង់សម្ភារៈបរិក្ខារវេជ្ជសាស្រ្ត។ ក្នុងនោះលោកជំទាវ វេជ្ជបណ្ឌិត យក់ សម្បតិ្ត បានជម្រាបជូនភាគីកូរ៉េ អំពីស្ថានភាពក្នុងការគ្រប់គ្រង នៃការរីករាលដាលជំងឺកូវីដ-១៩បំប្លែងថ្មី ប្រភេទអូមីក្រុង ដែលបានចូលមកដល់កម្ពុជា គិតរហូតមកដល់ឥលូវនេះ មានចំនួនជាង២០០ករណី ដែលភាគច្រើនបំផុត ជាករណីនាំចូល ទន្ទឹមនឹងនោះក៏មានករណីឆ្លងចូលក្នុងសហគមន៍ផងដែរ។

ជាមួយគ្នានោះដែរ លោក ហ្យន់ជូន នោ (Hyunjun RHO) ប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េ(កយកា-KOICA) ប្រចំាប្រទេសកម្ពុជា បានកោតសរសើរដល់រាជរដ្ឋាភិបាលកម្ពុជា ក៏ដូចជាក្រសួងសុខាភិបាល ក្នុងការខិតខំប្រឹងប្រែងទប់ស្កាត់ការរីករាលដាលជំងឺកូវីដ-១៩ ជាពិសេសបានផ្តល់ការចាក់វ៉ាក់សាំងបង្ការជំងឺកូវីដ-១៩ ដល់ប្រជាពលរដ្ឋនៅប្រទេសកម្ពុជា រួមទាំងជនជាតិបរទេស ដែលក្នុងនោះក៏មានជនជាតិកូរ៉េ ផងដែរ។

សូមបញ្ជាក់ផងដែរថា ជំនួយដែលសាធារណរដ្ឋកូរ៉េ ប្រគល់ជូនក្រសួងសុខាភិបាល នាថ្ងៃនេះ រួមមាន រថយន្តគិលានសង្រ្គោះចំនួន១០គ្រឿង និងឧបករណ៍ធ្វើតេស្តរហ័សចំនួន៨៣,៣២៥ឃីត គឺជាកញ្ចប់ថវិកានៅក្នុងគម្រោង គាំពារសុខភាព មាតា និងទារក នៅតំបន់ភូមិភាគឦសាន ដែលមានខេត្តរតនៈគីរី និងខេត្តមណ្ឌលគីរី នៃប្រទេសកម្ពុជា។ គម្រោងនេះ គឺជាគម្រោងពង្រឹងសមត្ថភាពនៃកម្មវិធីគាំពារមាតា និងទារក ក្នុងខេត្តទាំងពីរនេះ រយៈពេល៥ឆ្នាំ(២០១៩-២០២៣) ដែលមានថវិកាសរុប៧លានដុល្លារអាមេរិក ប៉ុន្តែជំនួយនាថ្ងៃនេះ គឺជាផ្នែកមួយ ក្នុងការប្រយុទ្ធប្រឆាំងនឹងជំងឺកូវីដ-១៩៕ អត្ថបទ ៖ រដ្ឋា