ប្រទេសរុស្ស៊ី បានដកការប្រកាសអាសន្នអំពីរលកយក្សស៊ូណាមិកាលពីថ្ងៃពុធ ៣០ ខែកក្កដា សប្ដាហ៍នេះបន្ទាប់ពីគ្រោះរញ្ជួយដីដ៏ធំនិងរលកយក្សស៊ូណាមិ បានវាយប្រហារតំបន់ចុងបូព៌ារបស់ប្រទេសនេះ។

ការរញ្ជួយដីកម្រិត៨,៨ រ៉ិចទ័របានវាយប្រហារនៅឆ្នេរសមុទ្រនៃឧបទ្វីប Kamchatka តំបន់ចុងបូព៌ា របស់រុស្ស៊ីកាលពីថ្ងៃពុធ ៣០ កក្កដា ដែលជំរុញឱ្យមានការជម្លៀសប្រជាពលរដ្ឋ និងការប្រកាសអាសន្នពីរលកយក្សស៊ូណាមិ នៅទូទាំងផ្នែកមួយចំនួនៃឆ្នេរមហាសមុទ្រប៉ាស៊ីហ្វិក។ 

ទូរទស្សន៍រដ្ឋរុស្ស៊ី កាលពីថ្ងៃពុធ បានចាក់ផ្សាយវីដេអូនៃរលកយក្សស៊ូណាមិដែលកំពុងបោកបក់កាត់ Severo-Kurilsk ដែលជាទីក្រុងឆ្នេរសមុទ្រនៅលើកោះមួយ នៅជិតប្រទេសជប៉ុន ដែលនាំយកអាគារនិងកម្ទេចកម្ទីចូលទៅក្នុងសមុទ្រ។  

យោងតាមអាជ្ញាធរបានឱ្យដឹងថា រលកយក្សស៊ូណាមិ បានបោកបក់កាត់តំបន់កំពង់ផែ និងបានលិចទឹករោងចក្រនេសាទនៅក្នុងទីក្រុងដែលមានមនុស្សប្រហែល២.០០០ នាក់ ចម្ងាយប្រហែល ៣៥០ គីឡូម៉ែត្រភាគនិរតី នៃចំណុចកណ្តាលនៃការរញ្ជួយដីក្រោមទឹកនេះបើយោងតាមក្រុមអាជ្ញាធរ៕