ក្រុមបុគ្គលិកផ្តល់ជំនួយបាននិយាយថា វិធានការថ្មីរបស់អ៊ីស្រាអែល - ដែលមានបំណងកែលម្អស្ថានភាពមនុស្សធម៌នៅតំបន់ហ្កាហ្សា - ពុំបានជួយអ្វីទាល់តែសោះ ដោយខ្វះខាតនូវអ្វីដែលត្រូវការ ហើយលទ្ធភាពទទួលបានជំនួយនៅតែបន្តត្រូវរារាំង ស្របពេលមានសញ្ញាគ្រោះទុរ្ភិក្សដែលកំពុងកើនឡើង។

វិធានការថ្មី — ដែលចូលជាធរមានកាលពីថ្ងៃអាទិត្យចុងសប្ដាហ៍មុន និងរួមបញ្ចូលការផ្អាកប្រយុទ្ធមនុស្សធម៌ប្រចាំថ្ងៃ ក៏ដូចជាជំនួយទម្លាក់ពីលើអាកាស និងបើកច្រករបៀងមនុស្សធម៌សម្រាប់រថយន្តដឹកជំនួយរបស់អង្គការសហប្រជាជាតិ — ត្រូវបានប្រកាសដោយអ៊ីស្រាអែល ខណៈសម្ពាធអន្តរជាតិកើនឡើងខ្លាំងជំរុញឱ្យកាត់បន្ថយវិបត្តិភាពអត់ឃ្លានរបស់ប្រជាជនប៉ាឡេស្ទីន។

ក្រុមជំនួយនិយាយថា ការរាំងខ្ទប់ជំនួយមនុស្សធម៌ពីអ៊ីស្រាអែល ចូលទៅតំបន់ហ្កាហ្សាស្ទ្រីប គឺជាមូលហេតុចម្បងនៃវិបត្តិអត់ឃ្លានដ៏អាក្រក់ ដែលធ្វើឱ្យប្រជាជនប៉ាឡេស្ទីនលើសពី ១៥០នាក់ហើយបានស្លាប់ ដោយសារភាពអត់ឃ្លានធ្ងន់ធ្ងរ ដែលច្រើនជាងពាក់កណ្តាលនៃតួលេខនេះបានស្លាប់ក្នុងខែមុន។ ខណៈដែលវិបត្តិជុំទិសកាន់តែជ្រៅ យោធាអ៊ីស្រាអែលនៅតែបន្តការវាយប្រហាររបស់ខ្លួន។

ចំនួនរថយន្តជំនួយដែលចូលទៅហ្កាហ្សា ចាប់តាំងពីវិធានការថ្មីត្រូវប្រកាសមក បានកើនឡើងបន្តិច ដោយមានរថយន្តដឹកទំនិញជាង ២០០គ្រឿង ចូលទៅដែនដីនេះកាលថ្ងៃអង្គារ ២៩ កក្កដា យោងតាមអាជ្ញាធរគយអ៊ីស្រាអែល (COGAT)។ ទោះយ៉ាងនេះក្ដី រថយន្តជំនួយនេះនៅតែតិចជាងតួលេខ ៥០០ទៅ៦០០គ្រឿង ដែលអង្គការសហប្រជាជាតិនិយាយថាត្រូវការចាំបាច់បំផុតដើម្បីទ្រទ្រង់ពលរដ្ឋហ្កាហ្សា ២លាននាក់។ ទីភ្នាក់ងារជំនួយមួយចំនួនលើកឡើងថា ទំហំនៃតម្រូវការពិតគឺធំធេងជាងរថយន្តដឹកទំនិញ ៦០០គ្រឿងទៅទៀត ដោយសារពេលនេះហ្កាហ្សាកំពុងប្រឈមគ្រោះទុរ្ភិក្សដ៏មហន្តរាយ៕