ភ្នំពេញ៖ ជារឿងគួរឱ្យសោកស្ដាយបំផុត ដែលវីរកណ្ដុរហិតរកមីននៅកម្ពុជាឈ្មោះ Magawa បានទទួលមរណភាពយ៉ាងសោកសៅបំផុតនៅអាយុប្រាំបីឆ្នាំ។ នេះបើតាមសំណេររបស់ Guinness World Records ដែលបានផ្សព្វផ្សាយនៅក្នុងគេហទំព័ររបស់ខ្លួន។

ប្រភពដដែលបន្តថា Magawa គឺជាកណ្ដុរដែលជាប់ជើងឯកលំដាប់ពិភពលោកថា ជាសត្វដែលបានរក ឃើញគ្រាប់មីនបានច្រើនបំផុត គឺរហូតដល់ ៧១ គ្រាប់ នៅក្នុងពេលបំពេញការងាររបស់វា។ កណ្ដុរយក្សអាហ្រ្វិកមួយនេះ ក៏ជាសត្វដែលបានទទួលមេដាយមាស PDSA ដែលជាពានរង្វាន់នៃភាពក្លាហានរបស់សត្វស្មើនឹងមេដាយ George Cross ផងដែរ។

Magawa ទទួលបានការបណ្តុះបណ្តាលដោយអង្គការសប្បុរសធម៌បែលហ្ស៊ិកឈ្មោះ APOPO ដើម្បីស្វែងរកគ្រាប់មីន និងសំណល់គ្រឿងផ្ទុះ។ Magawa បានក្លាយជាវីរកណ្ដុរ( Hero RAT)ជោគជ័យបំផុ ត។ នៅចន្លោះឆ្នាំ២០១៧ និង ២០២១, Magawa បានរកឃើញមីនជាច្រើនគ្រាប់នៅក្នុងខេត្តសៀម រាប និងព្រះវិហារ។ បន្ទាប់មកវាបានចូលនិវត្តន៍ពីការងារនេះនៅអាយុប្រាំពីរឆ្នាំ។ Magawa ក៏បានរកឃើញបំណែកគ្រឿងផ្ទុះប្រភេទ(ERW) ចំនួន៣៨ផ្សេងទៀត រួមទាំងគ្រាប់កាំភ្លើងត្បាល់ និងគ្រាប់បែកមិនទាន់ផ្ទុះជាច្រើនផងដែរ។ តាមរយៈការខិតខំប្រឹងប្រែងរបស់ Magawa បានផ្តល់ឱ្យសហគមន៍កម្ពុជា រស់នៅដោយគ្មានការភ័យខ្លាចពីសំណល់គ្រឿងផ្ទុះ។

Magawa កើតនៅអំឡុងខែវិច្ឆិកា ឆ្នាំ២០១៣ នៅសាកលវិទ្យាល័យ Sokoine University of Agriculture ក្នុងប្រទេសតង់ហ្សានី។ ទីនោះក៏ជាកន្លែងដែលកណ្ដុររកមីនរបស់ APOPO បានចាប់កំណើត និងបណ្តុះបណ្តាលផងដែរ។ នៅឆ្នាំ២០១៦, Magawa ត្រូវបានបញ្ជូនមកខេត្តសៀមរាបក្នុងប្រទេសកម្ពុជា ជាកន្លែងដែលវាចាប់ផ្តើមអាជីពជាសត្វរកសំណល់គ្រឿងផ្ទុះនៅទីនោះ។

APOPO បានឱ្យដឹងថា កណ្តុរមួយក្បាលអាចស្វែងរកតំបន់ដែលមានទំហំប៉ុនទីលានវាយ Tennis ក្នុងរយៈពេល២០នាទី។ ចំពោះមនុស្សវិញ ទំហំបែបនេះអាចចំណាយពេលពីមួយថ្ងៃ ទៅបួនថ្ងៃ៕​ ដោយ៖ គង់ ឌិន