ប្រភពផ្នែកវេជ្ជសាស្ត្របាននិយាយថា ការវាយប្រហាររបស់អ៊ីស្រាអែល បានសម្លាប់ពលរដ្ឋប៉ាឡេស្ទីនយ៉ាងហោចណាស់៧១នាក់ដែលកំពុងស្វែងរកជំនួយមនុស្សធម៌ក្នុងពេលមានវិបត្តិភាពអត់ឃ្លានកាន់តែធ្ងន់ធ្ងរនៅក្នុងតំបន់ហ្កាហ្សា ខណៈមន្ទីរពេទ្យនៅក្នុងដែនដីដែលត្រូវបានហ៊ុមព័ទ្ធនេះបានកត់ត្រាអ្នកស្លាប់ចំនួន៧នាក់ទៀតដោយសារទុរ្ភិក្ស និងកង្វះអាហារូបត្ថម្ភ។

យោងតាមការិយាល័យប្រព័ន្ធផ្សព្វផ្សាយរបស់អាជ្ញាធរតំបន់ហ្កាហ្សា បាននិយាយថា មនុស្សយ៉ាងហោចណាស់៥១នាក់ត្រូវបានសម្លាប់ និងមនុស្ស៦៤៨នាក់ផ្សេងទៀតបានរងរបួសដោយកងកម្លាំងអ៊ីស្រាអែលកាលពីថ្ងៃពុធ ខណៈពួកគេកំពុងធ្វើដំណើរឆ្ពោះទៅកាន់ចំណុចឆ្លងកាត់ Zikim ដើម្បីទៅដល់រថយន្តដឹកជំនួយដែលចូលទៅតំបន់ហ្កាហ្សាភាគខាងជើង។

មជ្ឈមណ្ឌលវេជ្ជសាស្ត្រ Nasser បានរាយការណ៍ថាមនុស្ស២០នាក់ផ្សេងទៀតដែលកំពុងស្វែងរកជំនួយក៏ត្រូវបានសម្លាប់នៅជិតច្រករបៀង Morag Corridor នៅជិតទីក្រុង Khan Younis នៅភាគខាងត្បូង តំបន់ហ្កាហ្សា ។

ពលរដ្ឋប៉ាឡេស្ទីនជាង១.០០០នាក់ដែលកំពុងស្វែងរកជំនួយត្រូវបានសម្លាប់ដោយកងកម្លាំងអ៊ីស្រាអែលនៅជិតកន្លែងចែកចាយជំនួយគ្រប់គ្រងដោយមូលនិធិមនុស្សធម៌ហ្កាហ្សាគាំទ្រដោយសហរដ្ឋអាមេរិក និងអ៊ីស្រាអែល ដែលបានបើកប្រតិបត្តិការកាលពីចុងខែឧសភា។

មូលនិធិមនុស្សធម៌ហ្កាហ្សា ត្រូវបានរិះគន់យ៉ាងខ្លាំងដោយអង្គការសហប្រជាជាតិ និងអង្គការមនុស្សធម៌ផ្សេងទៀត ចំពោះការបរាជ័យក្នុងការផ្តល់ជំនួយឲ្យបានគ្រប់គ្រាន់ និងសម្រាប់ស្ថានភាពសន្តិសុខដ៏តានតឹងនៅក្នុង និងជុំវិញ កន្លែងចែកចាយជំនួយរបស់ខ្លួន។

អាជ្ញាធរសុខាភិបាលតំបន់ហ្កាហ្សានិយាយថា មនុស្ស១៥៤នាក់រួមទាំងកុមារ៨៩នាក់បានស្លាប់ដោយសារកង្វះអាហារូបត្ថម្ភ ភាគច្រើនបំផុតក្នុងប៉ុន្មានសប្តាហ៍ថ្មីៗនេះ។