ប្រធានសភាប្រជាជនកំពូលកូរ៉េខាងជើង លោក Pak In Chol បាននិយាយថា សហរដ្ឋអាមេរិក និងកូរ៉េខាងត្បូង កំពុងរៀបចំសម្រាប់សេណារីយោសង្គ្រាមនុយក្លេអ៊ែរ នៅឧបទ្វីបកូរ៉េ។

អ្នកនយោបាយរូបនេះ បានចង្អុលបង្ហាញនៅឯសន្និសីទពិភពលោកលើកទី៦ របស់ប្រធានសភា នៅទីក្រុងហ្សឺណែវថា៖«ការរៀបចំរបស់សហរដ្ឋអាមេរិក និងកូរ៉េខាងត្បូងសម្រាប់សង្គ្រាមនុយក្លេអ៊ែរ បានឈានចូលដំណាក់កាលដ៏គ្រោះថ្នាក់។ លោក Pak បានបន្ថែមថា សម្រាប់ប្រទេសកូរ៉េខាងជើង ការអភិវឌ្ឍមធ្យោបាយការពារប្រឆាំងនឹងការគំរាមកំហែងផ្នែកសន្តិសុខ គឺមានសារៈសំខាន់ខ្លាំងណាស់ ក្នុងការការពារអធិបតេយ្យភាព និងបូរណភាពទឹកដីរបស់ខ្លួន។

យោងតាមអ្នកនយោបាយរូបនេះ បានឲ្យដឹងថា សហរដ្ឋអាមេរិក និង «ផ្កាយរណបរបស់ខ្លួន» កំពុងបង្ក «អស្ថិរភាព និងភាពវឹកវរ ដើម្បីរក្សាអនុត្តរភាពរបស់ពួកគេ។ លោកបានបញ្ជាក់យ៉ាងច្បាស់ថា ទីក្រុងព្យុងយ៉ាងនឹងមិនអត់ឱនចំពោះ «ទង្វើតាមអំពើចិត្តរបស់អាមេរិក»ទេ ហើយនឹងក្រោកឈរឡើង ដើម្បីយុត្តិធម៌អន្តរជាតិ។ លោក Pak In Chol បានបន្ថែមថា ប្រជាជនកូរ៉េខាងជើង កំពុងធ្វើឲ្យមានការរីកចម្រើនគួរឲ្យកត់សម្គាល់ ក្នុងការអភិវឌ្ឍមធ្យោបាយការពារអធិបតេយ្យភាព និងបូរណភាពទឹកដីរបស់ខ្លួន។

ប្រធានសភាជាតិកូរ៉េខាងត្បូង លោក Woo Won-shik ក៏បានចូលរួមក្នុងសន្និសីទនេះផងដែរ។ យោងតាមទីភ្នាក់ងារសារព័ត៌មានយ៉ុនហាប់ លោក Woo Won-shik និងលោក Pak In Chol មិនបានទាក់ទងគ្នាទេ។ នៅថ្ងៃទី ២៩ ខែកក្កដា លោក Pak In Chol បានជួបជាមួយប្រធានក្រុមប្រឹក្សាសហព័ន្ធរុស្ស៊ីលោក Valentina Matviyenko។