បណ្តាញទូរទស្សន៍ Al Hadath បានរាយការណ៍ដោយដកស្រង់ប្រភពមួយ នៅក្នុងក្រុមមេដឹកនាំ ហេសបូឡាថា ចលនាប្រដាប់អាវុធនៃអង្គការស៊ីអ៊ីតហេសបូឡា បានចាត់វិធានការ ដើម្បីការពារអ្នកគាំទ្ររបស់ខ្លួននៅភាគខាងត្បូងប្រទេសលីបង់ ប្រឆាំងនឹងការវាយប្រហារតាមអាកាសរបស់អ៊ីស្រាអែល។

យោងតាមទូរទស្សន៍នេះ អង្គការនេះ បានព្រមានទីក្រុងនានានៅក្នុងតំបន់ភាគខាងត្បូងដែលខ្លួនគ្រប់គ្រង«អំពីតម្រូវការក្នុងការរៀបចំជម្រកសម្រាប់អ្នករស់នៅក្នុងវិហារឥស្លាម និងបន្ទប់ធំៗ ក្នុងករណីមានប្រតិបត្តិការយោធាថ្មី នៅក្នុងប្រទេសលីបង់»។ យោងតាមប៉ុស្តិ៍ទូរទស្សន៍ដដែល សកម្មជនស៊ីអ៊ីត បានចាប់ផ្តើមចែកចាយឧបករណ៍បច្ចេកទេស នៅក្នុងភូមិសំខាន់ៗមួយចំនួន ដើម្បីបង្កើនការត្រៀមខ្លួនប្រយុទ្ធរបស់កងកម្លាំងរបស់ពួកគេ ក្នុងករណីការប្រឈមមុខដាក់គ្នាខាងយោធា ដែលអាចកើតមាន ឡើង។

បណ្តាញទូរទស្សន៍នេះ ក៏បានភ្ជាប់វិធានការសង្គ្រោះបន្ទាន់ទៅនឹងការបរាជ័យនៃកិច្ចខិតខំប្រឹងប្រែងសម្របសម្រួលរបស់អ្នកតំណាងពិសេសរបស់សហរដ្ឋអាមេរិកសម្រាប់តំបន់មជ្ឈិមបូព៌ា លោក Tom Barrack ដោយសារតែការបដិសេធរបស់ក្រុមហេសបូឡា មិនប្រគល់អាវុធរបស់ខ្លួន ទៅឲ្យកងទ័ពលីបង់ រហូតដល់អ៊ីស្រាអែលដកកងទ័ពទាំងស្រុងចេញពីសាធារណរដ្ឋនេះ។

នាពេលមុននេះ ទូរទស្សន៍ Al Hadath បានរាយការណ៍ថា អ៊ីស្រាអែលអាចបង្កើនសម្ពាធយោធាលើប្រទេសលីបង់ និងបន្តការវាយប្រហារទ្រង់ទ្រាយធំលើមូលដ្ឋានកងជីវពលស៊ីអ៊ីត នៅតំបន់ភាគខាងត្បូង និងភាគខាងកើត ក៏ដូចជាទីតាំងរបស់ពួកគេ នៅជាយក្រុងបេរូតជាដើម។