ភ្នំពេញ៖ អ្នកនាំពាក្យក្រសួងសុខាភិបាលកម្ពុជា លោកជំទាវ ឱ វណ្ណឌីន បានអំពាវនាវដោយទទូចឲ្យបងប្អូនជនរួមជាតិទាំងអស់បង្កើនការប្រុងប្រយ័ត្នបន្ថែមទៀត ជាពិសេសអនុវត្តឲ្យបានម៉ត់ចត់បំផុតចំពោះវិធានការ ៣ការពារ និង៣កុំ ខណៈកម្ពុជាមាន ករណីស្លាប់ជាលើកដំបូងដោយសារមេរោគកូវីដ១៩ ទៅលើបុរសជនជាតិខ្មែរម្នាក់ មានអាយុ៥០ឆ្នាំហើយនោះ។
ថ្លែងនៅក្នុងកិច្ចសម្ភាសន៍ពិសេសជាមួយប៊ីធីវី នាថ្ងៃទី១១ ខែមីនា ឆ្នាំ២០២១នេះ លោកជំទាវ ឱ វណ្ណឌីន បានលើកឡើងថា វាជាការចាំបាច់បំផុត ចំពោះបងប្អូនប្រជាពលរដ្ឋគ្រប់រូប ដែលត្រូវរួមគ្នាគ្រប់ពេលវេលា និងគ្រប់កាលៈទេសៈទាំងអស់ក្នុងការទប់ស្កាត់ នៃការរីករាលដាលនូវមេរោគកូវីដ-១៩នេះ ដោយមិនត្រូវមើលងាយ និងមើលស្រាលនូវស្ថានការណ៍នោះឡើយ ហើយទៅមុខទៀត ក៏យើងមិនទាន់ដឹងថា វានឹងមានអ្វីធ្ងន់ធ្ងរជាងនេះទៅទៀតនោះផងដែរ។
ជាមួយគ្នានោះដែរ លោកជំទាវ ឱ វណ្ណឌីន ក៏បានបញ្ជាក់បន្ថែមអំពីករណីស្លាប់ បុរសខ្មែរម្នាក់ អាយុ៥០ឆ្នាំដោយសារមេរោគកូវីដ១៩ នាព្រឹកថ្ងៃនេះផងដែរ ដោយលោកជំទាវ បានបញ្ជាក់ថា មកពីស្ថានភាពជំងឺរបស់បុរសនេះ មានលក្ខណៈធ្ងន់ធ្ងរបំផុតចំពោះសួតរបស់គាត់ ដោយមិនអាចជួយគាត់ឲ្យបានទាន់ពេលវេលានោះ។
យ៉ាងណាក៏ដោយលោកជំទាវ ឱ វណ្ណឌីន ក្នុងនាមក្រសួងសុខាភិបាលកម្ពុជា មានការសោកស្តាយ យ៉ាងខ្លាំង ចំពោះករណីបុរសជនជាតិខ្មែរ ដែលបានស្លាប់ដោយសារមេរោគកាចសាហាវមួយ ហើយក្រសួងសុខាភិបាល សូមចូលរួមរំលែកទុក្ខជាមួយក្រុមគ្រួសារសពផងដែរ។
សូមបញ្ជាក់ថា រហូតមកដល់ថ្ងៃទី១១ ខែមីនា ឆ្នាំ២០២១នេះ ប្រទេសកម្ពុជាមានករណីឆ្លងនូវមេរោគកូវីដ-១៩នេះឡើង ដល់ចំនួន ១១៦៣នាក់ហើយ ដោយក្នុងនោះ អ្នកជាសះស្បើយចំនួន ៥៩៧នាក់ និងអ្នកបន្តសម្រាកព្យាបាលចំនួន ៥៦៤នាក់ ខណៈម្នាក់ត្រូវបានបាត់បង់ជីវីនៅព្រឹកថ្ងៃទី១១ ខែមីនានេះ នៅមន្ទីរពេទ្យ ខ្មែរ-សូវៀតនោះ៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
