​បាល់ទាត់៖ ​ក្រុម​តោ​ខៀវ Chelsea បាន​បន្តដំណើរ​ឡើង​វគ្គ​ផ្តាច់ព្រ័ត្រ​ហើយ​នៃ​ការប្រកួត​ពានរង្វាន់ Carabao Cup រឺ EFL Cup ក្រោយ​យកឈ្នះ Tottenham Hotspur នៅ​វគ្គ​ពាក់កណ្តាល​ផ្តាច់ព្រ័ត្រ​។ ​​បន្ទាប់ពី​នាំមុខ ២គ្រាប់​នៅ​ជើង​ទី១ នៅ​ទឹកដី Stamford Bridge សប្តាហ៍​មុន Chelsea ក៏​រកបាន​គ្រាប់​នាំមុខ​សរុប ៣គ្រាប់​ដោយ​គ្រាប់​បាល់​របស់​ខ្សែការពារ​អាល្លឺម៉ង់ Antonio Rudiger នៅ​នាទី​ទី១៨​។

​​ជា​យប់​ដែល​គ្មាន​សំណាង​មួយ​សំរាប់ Spurs បន្ទាប់ពី​ឱកាស​បាល់​ពិន័យ ១១ម៉ែត្រ​ដល់​ទៅ​ ២លើក​ត្រូវ​លុបចោលវិញ​ដោយសារ VAR បូក​រួមទាំង​ខ្សែប្រយុទ្ធ​អង់គ្លេស Harry Kane ស៊ុត​បញ្ចូល​ទី ១​គ្រាប់​តែ​ជំហរ​ក្រៅ​ល្បែង​ទៅទៀត​។ ​អ្នកចាត់ការ Spurs លោក Antonio Conte ដែល​ធ្លាប់​ដឹកនាំ Chelsea លើក​ពាន Premier League និង FA Cup នោះបាន​និយាយ​ក្រោយ​ចប់​ការប្រកួត​ថា ជាការ​ពិត Spurs បើ​ចង់​ឈ្នះ​ពាន​ជា​ដុំកំភួន​គឺ​ទាមទារ​ឱ្យមាន​ការវិនិយោគ​បន្ថែមទៀត​។ ​​ចំណែក Chelsea នៅពេលនេះ​បាន​ឈានឡើង​វគ្គ​ផ្តាច់ព្រ័ត្រ ៣កម្មវិធី​ជាប់​គ្នា​ក្រោម​ការដឹកនាំ​របស់លោក Thomas Tuchel តាំងពី​ចូលកាន់​តំណែង​ជំនួស Frank Lampard ឆ្នាំមុន​។ ​​Chelsea នឹងត្រូវ​រង់ចាំ​ជួប​ជាមួយ Liverpool រឺ Arsenal ដែល​មិនទាន់​ជួបគ្នា​មួយ​ជើង​នៅ​ឡើយ ​ក្រោយ​ការប្រកួត​ត្រូវបាន​លើក​ពេល​ដោយសារ Covid-19៕

​អត្ថបទ​៖​នាង សុភា​វុ​ធ