កងកម្លាំងសន្តិសុខប្រទេសអាហ្សង់ទីន អ្នកចូលនិវត្តន៍និងអ្នកគាំទ្រជាច្រើននាក់ បានប៉ះទង្គិចគ្នាកាលពីថ្ងៃពុធ នៅខាងមុខសភា ក្នុងអំឡុងការតវ៉ាប្រឆាំងការប្រើសិទ្ធវ៉េតូរបស់លោកប្រធានាធិបតី Javier Milei នៃច្បាប់ ដែលត្រូវបានអនុម័តដោយសភាបង្គាប់ឱ្យដំឡើងប្រាក់សោធននិវត្តន៍។

យោងតាមរបាយការណ៍របស់ប្រព័ន្ធផ្សព្វផ្សាយរបស់ប្រទេសអាហ្សង់ទីន បានឲ្យដឹងថា ការប៉ះទង្គិចគ្នារវាងនគរបាល និងក្រុមអ្នកតវ៉ា បានចាប់ផ្តើមនៅពេលដែលកងកម្លាំងសន្តិសុខព្យាយាមរារាំងក្រុមបាតុករមិនឱ្យដើរឆ្ពោះទៅកាន់វិមានសភា។

គណៈកម្មការសម្រាប់ការចងចាំ (CPM) ជាស្ថាប័នសាធារណៈស្វយ័តដែលផ្សព្វផ្សាយនិងអនុវត្តគោលនយោបាយសាធារណៈនៃការចងចាំ និងសិទ្ធិមនុស្ស បានរាយការណ៍ថា មានអ្នករងរបួសជាង ៣០ នាក់ ហើយមនុស្ស៧នាក់ត្រូវបានឃុំខ្លួននៅក្នុងការតវ៉ា។

បាតុកម្មប្រចាំសប្តាហ៍ ធ្វើឡើងនៅខាងក្រៅសភាអាហ្សង់ទីន ត្រូវបានរៀបចំឡើងដោយអ្នកចូលនិវត្តន៍ដែលទាមទារប្រាក់សោធននិវត្តន៍កាន់តែប្រសើរ និងបានច្រានចោលការកាត់ផ្តាច់របស់លោក Milei ចំពោះការផ្តល់ឱសថដោយឥតគិតថ្លៃ ក្នុងចំណោមការសោកស្ដាយផ្សេងៗទៀត។

លោក Milei បានប្តេជ្ញាថានឹងប្រើសិទ្ធវ៉េតូក្នុងការដំឡើងប្រាក់សោធននិវត្តន៍ ហើយបានធ្វើរួចហើយនៅក្នុងចំណាត់ការស្រដៀងគ្នានេះកាលពីឆ្នាំមុន។ ចាប់តាំងពីឡើងកាន់តំណែងមក លោកបានកាត់បន្ថយការចំណាយសាធារណៈក្នុងគោលបំណងដើម្បីដោះស្រាយអតិផរណាឲ្យស្ថិតនៅក្រោមការគ្រប់គ្រង ទោះបីជាការរឹតត្បិតថវិកា ធ្វើឲ្យប៉ះពាល់ដល់បុគ្គលិកកម្មករយ៉ាងណាក៏ដោយ។