ប្រធានាធិបតីអាមេរិក លោក Donald Trump នៅថ្ងៃព្រហស្បតិ៍ (ទី៣១ ខែកក្កដា) នេះ បានលើកឡើងថា កិច្ចព្រមព្រៀងពាណិជ្ជកម្មជាមួយកាណាដា នឹងពិបាកកើតឡើង បន្ទាប់ពីប្រទេសនេះបានប្រកាសថា ខ្លួនកំពុងគាំទ្រភាពជារដ្ឋរបស់ប៉ាឡេស្ទីន។

នាយករដ្ឋមន្ត្រី លោក Mark Carney បានប្រកាសកាលពីថ្ងៃពុធថា ប្រទេសកាណាដានឹងគ្រោងទទួលស្គាល់រដ្ឋប៉ាឡេស្ទីន នៅឯមហាសន្និបាតអង្គការសហប្រជាជាតិ (UN) ក្នុងខែកញ្ញា ជាការសម្រេចដែលនាំឲ្យមានការថ្កោលទោសភ្លាមៗពីអ៊ីស្រាអែល។

តែយ៉ាងណាក្ដី លោក Carney បានបញ្ជាក់ថា ចំណាត់ការនេះ គឺអាស្រ័យលើអាជ្ញាធរប៉ាឡេស្ទីនប្តេជ្ញាចិត្តធ្វើកំណែទម្រង់សំខាន់ៗ ក្នុងនោះរួមទាំងការសើរើឡើងវិញនូវប្រព័ន្ធអភិបាលកិច្ចរបស់ខ្លួន និងការរៀបចំការបោះឆ្នោតសកល នៅឆ្នាំ២០២៦ ដែលក្រុមហាម៉ាសនឹងមិនអាចចូលរួមបានឡើយ។ 

លោក Carney បានប្រាប់ថា «លទ្ធភាពនៃដំណោះស្រាយរដ្ឋ២ កំពុងត្រូវបានរលាយបន្តិចម្ដងៗ នៅចំពោះមុខយើង» ដោយលោកបានបន្ថែមថា កាណាដាកំពុងធ្វើការជាមួយដៃគូអន្តរជាតិ ដើម្បីធានាឲ្យបានថា ដំណោះស្រាយបែបនេះនៅតែអាចដំណើរការបាន។ លោក Carney បានសង្កត់ធ្ងន់ថា៖ «កាណាដាបានប្តេជ្ញាចិត្តជាយូរមកហើយ ចំពោះដំណោះស្រាយរដ្ឋ២ ពោលគឺជារដ្ឋប៉ាឡេស្ទីនឯករាជ្យ ឋិតថេរ និងអធិបតេយ្យភាពដែលរស់នៅក្បែររដ្ឋអ៊ីស្រាអែល ក្នុងសន្តិភាព និងសន្តិសុខ»។

ចំណាត់ការនេះធ្វើឲ្យកាណាដាស្របជាមួយបារាំង ដែលបានសន្យាទទួលស្គាល់រដ្ឋប៉ាឡេស្ទីន ក្នុងខែកញ្ញា និងចក្រភពអង់គ្លេសដែលបានប្រាប់ថា ខ្លួននឹងធ្វើតាមដែរ ប្រសិនបើអ៊ីស្រាអែលមិនយល់ព្រមលើលក្ខខណ្ឌនានា ក្នុងនោះរួមទាំងការមានបទឈប់បាញ់ នៅតំបន់ហ្កាហ្សា។

មន្ត្រីសេតវិមានម្នាក់ដែលដឹងពីគោលជំហររបស់លោក Trump បាននិយាយថា លោកប្រធានាធិបតី ជឿថា ការទទួលស្គាល់រដ្ឋប៉ាឡេស្ទីន គឺស្មើនឹង «ការផ្តល់រង្វាន់ដល់ក្រុមហាម៉ាស» ហើយថា «ក្រុមនេះមិនសមទទួលបានរង្វាន់នោះឡើយ»៕