បើយោងតាមសេចក្តីថ្លែងការណ៍របស់ក្រសួងការបរទេសចិន បានឲ្យដឹងថា រដ្ឋមន្ត្រីការបរទេសចិន លោក Wang Yi កាលពីថ្ងៃពុធ (ទី៣០ ខែកក្កដា) បានអំពាវនាវឲ្យមានជំនួបបន្ថែមទៀតជាមួយសហរដ្ឋអាមេរិក និងបានរំលឹកកុំឲ្យមានការប្រឈមមុខដាក់គ្នា រវាងមហាអំណាចពិភពលោកទាំង២។

ក្រសួងបានឲ្យដឹងថា លោក Wang បានធ្វើការអត្ថាធិប្បាយបែបនេះ ក្នុងអំឡុងកិច្ចប្រជុំ នៅទីក្រុងប៉េកាំងជាមួយគណៈប្រតិភូធុរកិច្ចអាមេរិក ដែលរួមមានទាំងនាយកប្រតិបត្តិក្រុមហ៊ុន Goldman Sachs, Boeing និង Apple ផងដែរ។ លោក Wang ត្រូវបានដកស្រង់សម្តី ដែលនិយាយថា៖ «ប្រទេសចិនមានឆន្ទៈ ក្នុងការបង្កើនការជួបគ្នាជាមួយសហរដ្ឋអាមេរិក ជៀសវាងបង្កើតកំហុសឆ្គង ដោះស្រាយការខ្វែងគំនិតគ្នា និងស្វែងរកកិច្ចសហប្រតិបត្តិការ»។

ការកត់សម្គាល់របស់លោក បានធ្វើឡើងមួយថ្ងៃបន្ទាប់ពីក្រុមអ្នកចរចាជាន់ខ្ពស់របស់ចិន និងសហរដ្ឋអាមេរិក បានបញ្ចប់កិច្ចចរចាពាណិជ្ជកម្មចុងក្រោយបង្អស់ នៅទីក្រុង Stockholm ប្រទេសស៊ុយអែត ដោយភាគីទាំង២ បានយល់ព្រមស្វែងរកការបន្តផ្អាកសង្គ្រាមពន្ធរយៈពេល ៩០ថ្ងៃរបស់ប្រទេសទាំង២ ដែលបានឈានដល់កាលពីខែឧសភា។

លោក Wang បានសង្កត់ធ្ងន់ថា ទំនាក់ទំនងចិន-អាមេរិក ត្រូវបានប៉ះពាល់ដោយព្រឹត្តិការណ៍វិវត្តន៍ជាសកល ហើយមានឥទ្ធិពលយ៉ាងខ្លាំងទៅលើសក្ដានុពលអន្តរជាតិ៕