អាជ្ញាធរអ៊ុយក្រែន បាននិយាយនៅថ្ងៃព្រហស្បតិ៍នេះថា ប្រទេសរុស្ស៊ី បានវាយប្រហាររដ្ឋធានីរបស់ប្រទេសអ៊ុយក្រែនដោយមីស៊ីល និងយានដ្រូន នៅពេលយប់ ដោយបានសម្លាប់មនុស្សយ៉ាងហោចណាស់ ៦នាក់ ក្នុងនោះមានក្មេងប្រុសអាយុ ៦ឆ្នាំម្នាក់ផងដែរ។

ប្រធានរដ្ឋបាលយោធាទីក្រុងគីវ លោក Tymur Tkachenko បាននិយាយថា យ៉ាងហោចណាស់មនុស្ស 52 នាក់ផ្សេងទៀត បានរងរបួស នៅក្នុងការវាយប្រហារនេះ ហើយចំនួននេះ ទំនងជាកើនឡើងថែមទៀត។

លោក Tkachenko បានបន្ថែមថា មួយផ្នែកធំនៃអគារលំនៅឋានកម្ពស់ ៩ជាន់ បានដួលរលំ បន្ទាប់ពីវាត្រូវបានវាយប្រហារ។ ក្រុមជួយសង្គ្រោះ បាននៅកន្លែងកើតហេតុ ដើម្បីជួយសង្គ្រោះមនុស្សដែលជាប់នៅក្រោមគំនរបាក់បែក។

ប្រធានាធិបតីអ៊ុយក្រែនលោក វ្ល៉ូឌីមី ហ្សេឡិនស្គី (Volodymyr Zelensky) បានសរសេរនៅលើ Telegram ផ្លូវការរបស់លោកថា៖«ការវាយប្រហារដោយមីស៊ីលដោយផ្ទាល់ ទៅលើអគារលំនៅដ្ឋាន។ មនុស្សស្ថិតនៅក្រោមគំនរបាក់បែក។ សេវាកម្មទាំងអស់ កំពុងធ្វើការ នៅទីតាំងដែលរងការវាយប្រហារនោះ»។