ប្រធានាធិបតីអ៊ុយក្រែន លោក Volodymyr Zelenskyy នៅថ្ងៃព្រហស្បតិ៍ (ទី៣១ ខែកក្កដា) នេះ បានជំរុញឲ្យសម្ព័ន្ធមិត្តរបស់លោកនាំឲ្យមាន «ការផ្លាស់ប្តូររបប» នៅក្នុងប្រទេសរុស្ស៊ី ដោយការអំពាវនាវនេះកើតមានឡើងប៉ុន្មានម៉ោងបន្ទាប់ពីការវាយប្រហារដោយយានដ្រូន និងមីស៊ីលរបស់រុស្ស៊ីលើទីក្រុងគីវ បានសម្លាប់មនុស្ស ៧នាក់ ក្នុងនោះរួមមានទាំងក្មេងប្រុសអាយុ ៦ឆ្នាំផងដែរ។

បើយោងតាមអាជ្ញាធរ បានឲ្យដឹងថា ការវាយប្រហារពេញមួយយប់ បានធ្វើឲ្យផ្នែកនៃប្លុកផ្ទះល្វែងកម្ពស់ ៩ជាន់ នៅជាយក្រុងភាគខាងលិចនៃទីក្រុង Kyiv បាក់បែកខូចខាត ហើយបណ្ដាលឲ្យមនុស្សរាប់សិបនាក់ផ្សេងទៀតរងរបួស។

អំឡុងពេលនិយាយតាមវីដេអូទៅកាន់សន្និសីទរំលឹកខួប ៥០ឆ្នាំ ចាប់តាំងពីការចុះហត្ថលេខាលើកិច្ចព្រមព្រៀងទីក្រុង Helsinki សម័យសង្រ្គាមត្រជាក់ លោក Zelenskyy បាននិយាយថា លោកជឿថា ប្រទេសរុស្ស៊ីអាចត្រូវតែត្រូវបាន «ដាក់សម្ពាធ» ឲ្យបញ្ឈប់សង្គ្រាម។

មេដឹកនាំអ៊ុយក្រែនរូបនេះបានបន្ថែមថា៖ «ប៉ុន្តែប្រសិនបើពិភពលោកមិនមានបំណងផ្លាស់ប្តូររបប នៅក្នុងប្រទេសរុស្ស៊ីទេ នោះមានន័យថា ទោះបីជាបន្ទាប់ពីសង្គ្រាមត្រូវបានបញ្ចប់ក៏ដោយ ក៏ទីក្រុងមូស្គូនឹងនៅតែព្យាយាមធ្វើឲ្យប្រទេសជិតខាងមានអស្ថិរភាពដដែល»។

គួរបញ្ជាក់ថា កងទ័ពអាកាសអ៊ុយក្រែន បានឲ្យដឹងថា នៅចន្លោះពីល្ងាចថ្ងៃពុធ និងព្រឹកថ្ងៃព្រហស្បតិ៍នេះ រុស្ស៊ីបានបាញ់យានដ្រូនជាង ៣០០គ្រឿង និងមីស៊ីលតម្រង់គោលដៅចំនួន ៨គ្រាប់លើអ៊ុយក្រែន ដោយគោលដៅសំខាន់ គឺទីក្រុងគីវ៕