ទីភ្នាក់ងារសារព័ត៌មាន SANA បានរាយការណ៍ថា រដ្ឋមន្ត្រីការបរទេសស៊ីរី លោក Asaad Hassan al-Shaibani បានមកដល់ទីក្រុងមូស្គូ នៅថ្ងៃព្រហស្បតិ៍នេះ ដោយដឹកនាំគណៈប្រតិភូជាន់ខ្ពស់មួយក្រុមសម្រាប់ដំណើរទស្សនកិច្ចផ្លូវការ ក្នុងគោលបំណងបញ្ជាក់ឡើងវិញនូវទំនាក់ទំនងជាមួយរុស្ស៊ី ចំពេលមានការផ្លាស់ប្តូរនយោបាយរបស់ប្រទេសស៊ីរី។

ដំណើរទស្សនកិច្ចនេះ គឺជាការចូលរួមជាផ្លូវការលើកដំបូងរវាងប្រទេសទាំងពីរ ចាប់តាំងពីការផ្តួលរំលំអតីតប្រធានាធិបតីលោក បាសា អាល់អាសាដ ( Bashar al-Assad) កាលពីឆ្នាំមុន ដែលរដ្ឋាភិបាលដែលគាំទ្រដោយទីក្រុងមូស្គូ បានធ្លាក់ចូលទៅក្នុងការវាយលុករបស់ពួកឧទ្ទាមយ៉ាងឆាប់រហ័ស ដែលបានបញ្ចប់ការគ្រប់គ្រងគ្រួសាររបស់លោក អាសាស ជិត ៥ទសវត្សរ៍។ លោក អាសាដ ត្រូវបានគេរាយការណ៍ថា បានភៀសខ្លួនទៅកាន់ប្រទេសរុស្ស៊ី បន្ទាប់ពីរបបរបស់លោក បានដួលរលំ។

នៅក្នុងជំនួបរបស់លោក ជាមួយរដ្ឋមន្ត្រីការបរទេសរុស្ស៊ី លោក Sergey Lavrov នៅទីស្តីការក្រសួងការបរទេសរុស្ស៊ី លោក al-Shaibani បាននិយាយថា ប្រទេសស៊ីរី ស្វែងរកការកសាង «ទំនាក់ទំនងត្រឹមត្រូវ និងស៊ីជម្រៅ ជាមួយទីក្រុងមូស្គូ ដោយផ្អែកលើ «កិច្ចសហប្រតិបត្តិការ និងការគោរពគ្នាទៅវិញទៅមក»។ លោកបានសង្កត់ធ្ងន់ថា ការដឹកនាំថ្មីតំណាងឲ្យចក្ខុវិស័យនៃការរួបរួម និងការកសាងឡើងវិញសម្រាប់ប្រទេសស៊ីរី ដែលបានប្រឈមមុខនឹងជម្លោះ និងអស្ថិរភាពជាច្រើនឆ្នាំ។