ក្រុមអ្នកជម្លៀសខ្លួន បានធ្វើដំណើរតាមរថយន្តក្រុងចាកចេញពីទីក្រុង Dobropillia ជាមួយនឹងទ្រព្យសម្បត្តិរបស់ពួកគេ ខណៈទីក្រុងនៅតំបន់ Donetskមួយនេះ ក្លាយជាខ្សែត្រៀមមុខនៃការវាយប្រហាររបស់ទាហានរុស្ស៊ី ។

អ្នកស្រី Liubov ដែលស្ថិតក្នុងចំណោមជនស៊ីវិលត្រូវបានជម្លៀសចេញដោយអាជ្ញាធរអ៊ុយក្រែន និយាយថា វាពិបាករស់នៅកន្លែងណាស់ ប៉ុន្តែគាត់គ្មានជម្រើសនោះទេ ។

ទីក្រុង Dobropillia ដែលធ្លាប់ជាទីក្រុងរ៉ែធ្យូងថ្មដ៏សំខាន់អំឡុងសម័យសហភាពសូវៀត និងមានពលរដ្ឋរស់នៅ ៣ម៉ឺននាក់នោះ ត្រូវបានគេមើលឃើញថា ជាខ្សែត្រៀមមុខ ក្នុងរយៈពេល ១៨ខែកន្លងមកនេះ ក្រោយការរុលចូលរបស់ទាហានរុស្ស៊ី ។

ទាហានក្រុងម៉ូស្គូដែលនៅចម្ងាយ ៥០គ.មកាលពីដើមឆ្នាំនេះ បច្ចុប្បន្នស្ថិតនៅចម្ងាយ ១៥គ.មប៉ុណ្ណោះពីទីក្រុង Dobropillia ដែលធ្វើឲ្យពួកគេអាចវាយប្រហារគោលដៅដោយប្រើប្រាស់យានដ្រូនដឹកគ្រឿងផ្ទុះ ។

ការទម្លាក់គ្រាប់បែកទម្ងន់កន្លះតោនរបស់រុស្ស៊ីលើផ្សារទំនើបសំខាន់មួយកន្លែងនៅក្នុងទីក្រុង Dobropillia កាលពីថ្ងៃទី ១៦ ខែសីហា បានសម្លាប់មនុស្ស ២នាក់ និងមនុស្សជាង ២០នាក់ផ្សេងទៀត រងរបួស ។

លោក Denys Naumov គឺជាអ្នកស្ម័គ្រចិត្តជម្លៀសជនស៊ីវិលមួយរូប និយាយថា ស្ថានភាពនៅតំបន់នេះ កាន់តែអាក្រក់ខ្លាំងនារយៈពេលជាង ២សប្តាហ៍កន្លងមកនេះ ហើយមនុស្ស ១.២៥០នាក់ ត្រូវបានជម្លៀសខ្លួន ចាប់តាំងពីពេលនោះមក ៕