ស៊ីហ្គេម៖ លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡាបានអះអាងថា នឹងពិនិត្យលទ្ធភាពដើម្បីជំរុញការបិទខ្ទប់ប្រមូលផ្ដុំហ្វឹកហាត់ ក្រុមជម្រើសជាតិមួយចំនួនទៀតនៅក្នុងពហុកីឡដ្ឋានជាតិមរតកតេជោ ដើម្បីសម្រួចសមត្ថភាព និងបច្ចេកទេសត្រៀមឆ្ពោះទៅស៊ីហ្គេមឆ្នាំ២០២២ នៅវៀតណាមផង និងស៊ីហ្គេមឆ្នាំ២០២៣ នៅកម្ពុជាផង។
ការលើកឡើងនេះ បន្ទាប់ពីមានការចង្អុលបង្ហាញដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា កាលពីថ្មីៗ ដោយជំរុញឲ្យធ្វើការប្រមូលផ្ដុំហ្វឹកហាត់នៅកន្លែងថ្មី គឺពហុកីឡដ្ឋានជាតិមរតកតេជោ ដ្បិតពហុកីឡដ្ឋានជាតិអូឡាំពិកនៅបន្ដជាកន្លែងព្យាបាលអ្នកជំងឺកូវីដ-១៩ នៅឡើយ។ លោក ប៉ុន សុខ បានបញ្ជាក់ថា កាលពីឆ្នាំ២០២១ មានក្រុមជម្រើសជាតិ ១៦ប្រភេទកីឡាមកហើយដែលបានប្រមូលផ្ដុំហ្វឹកហាត់នៅពហុកីឡដ្ឋានជាតិមរតកតេជោ ហើយឆ្នាំថ្មីនេះមជ្ឈមណ្ឌលនឹងខំប្រឹងឲ្យអស់ពីសមត្ថភាព ដើម្បីរៀបចំទីលានហ្វឹកហាត់ប្រភេទកីឡាមួយចំនួនទៀត ប្រសិនបើស្ថានភាពកូវីដមិនទាន់អំណោយផល អាចត្រឡប់ទៅរៀបចំហ្វឹកហាត់នៅពហុកីឡដ្ឋានជាតិអូឡាំពិកបានវិញ។
គួរដឹងថា ក្នុងពិធីប្រគល់ប្រាក់រង្វាន់ជ័យលាភីម្ចាស់មេដាយមាសកីឡាប៉េតង់ពិភពលោកជូនវីរកីឡាការិនី អ៊ុក ស្រីមុំ កាលពីថ្មីៗ សម្ដេចតេជោ ហ៊ុន សែន បានរំលឹកថា សម្ដេចកំពុងជំពាក់កីឡាករ-កីឡាការិនីនូវកន្លែងហ្វឹកហាត់ និងប្រកួតកីឡានោះគឺពហុកីឡដ្ឋានជាតិមរតកតេជោ ដែលក្រោយកូវីដ-១៩ បានវាយលុកខ្លាំង រាជរដ្ឋាភិបាលក៏បានសម្រេចយកទីតាំងនេះធ្វើជាមណ្ឌលព្យាបាលអ្នកជំងឺកូវីដ។ សម្ដេចតេជោនាយករដ្ឋមន្ដ្រីបានមានប្រសាសន៍បន្ថែមថា ដល់បច្ចុប្បន្នបន្ទាប់ពីស្ថានភាពកូវីដ-១៩ ធូរស្រាល រាជរដ្ឋាភិបាលបានប្រគល់កន្លែងមួយចំនួនដែលខ្ចីពីវិស័យឯកជនឲ្យទៅវិស័យឯកជនវិញ នៅឡើយតែពហុកីឡដ្ឋានជាំតិអូឡាំពិកដែលមិនទាន់ផ្ដល់ឲ្យផ្នែកកីឡា ។ តាមរយៈនេះ សម្ដេចបានជំរុញឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ធ្វើការជាមួយក្រសួងសុខាភិបាលដើម្បីពន្លឿនការធ្វើមន្ទីរពេទ្យព្យាបាលអ្នកជំងឺកូវីដ-១៩ ឲ្យបានលឿនដើម្បីរំដោះអ្នកជំងឺចេញពីស្ដាតអូឡាំពិក ហើយប្រគល់ឲ្យផ្នែកកីឡាវិញដើម្បីប្រើប្រាស់ជាទិសដៅឆ្ពោះទៅស៊ីហ្គេមឆ្នាំ២០២៣៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
