នៅថ្ងៃព្រហស្បតិ៍នេះ ក្នុងសារបង្ហោះលើបណ្តាញព័ត៌មានសង្គម ប្រធានាធិបតីសហរដ្ឋអាមេរិកលោក Donald Trump បានអំពាវនាវឲ្យក្រុមហាម៉ាសចុះចាញ់ និងដោះលែងចំណាប់ថ្នូរ ។

លោកបានសរសេរថា វិធីសាស្រ្តលឿនបំផុត ដើម្បីបញ្ចប់វិបត្តិមនុស្សធម៌នៅតំបន់ហ្កាហ្សា គឺក្រុមហាម៉ាស ត្រូវតែចុះចាញ់ និងដោះលែងចំណាប់ថ្នូរ ។

ការបង្ហោះសាររបស់លោក Trump បានកើតមានឡើង ស្របពេលដែលប្រេសិតពិសេសសហរដ្ឋអាមេរិកលោក Steve Witkoff ត្រូវបានគេរំពឹងថា នឹងធ្វើដំណើរទៅដល់ប្រទេសអ៊ីស្រាអែលនៅថ្ងៃព្រហស្បតិ៍នេះ ដើម្បីសង្រ្គោះកិច្ចប្រជុំស្វែងរកបទឈប់បាញ់ហ្កាហ្សា និងដោះស្រាយវិបត្តិមនុស្សធម៌នៅដែនដីប៉ាឡេស្ទីនមួយនេះ ជាទីដែលក្រុមតាមដានភាពអត់ឃ្លានសកលលោក ព្រមានថា គ្រោះទុរ្ភិក្ស ចាប់ផ្តើមលេចចេញជារូងរាងឡើងហើយ ។

ដោយឡែក កិច្ចប្រជុំបទឈប់បាញ់ដោយប្រយោលរវាងអ៊ីស្រាអែល និងក្រុមជីវពលប៉ាឡេស្ទីនហាម៉ាស នៅទីក្រុងដូហា ប្រទេសកាតា បញ្ចប់ទៅជាមួយភាពទាល់ច្រកកាលពីសប្តាហ៍មុន ដោយភាគីទាំង ២ ដាក់ការស្តីបន្ទោសឲ្យគ្នាទៅវិញទៅមកសម្រាប់ភាពជាប់គាំងនេះ ហើយគំលាតនៅតែមានជុំវិញបញ្ហាដកកងទ័ពរបស់អ៊ីស្រាអែល ៕