បេសកជនពិសេសរបស់សហរដ្ឋអាមេរិក លោក Steve Witkoff បានជួបជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu នៅថ្ងៃព្រហស្បតិ៍ (ទី៣១ ខែកក្កដា) នេះ ដើម្បីសង្គ្រោះកិច្ចចរចាបទឈប់បាញ់នៅតំបន់ហ្កាហ្សា និងដោះស្រាយវិបត្តិមនុស្សធម៌នៅក្នុងដែនដីប៉ាឡេស្ទីន ជាកន្លែងអ្នកឃ្លាំមើលភាពអត់ឃ្លានទូទាំងពិភពលោក បានព្រមានថា គ្រោះទុរ្ភិក្សកំពុងចាប់ផ្ដើមមានបណ្ដើរៗហើយ។

រូបភាពដែលចេញផ្សាយដោយការិយាល័យសារព័ត៌មានរបស់រដ្ឋាភិបាលអ៊ីស្រាអែល បង្ហាញឲ្យឃើញលោក Witkoff និងលោក Netanyahu ចាប់ដៃគ្នា ហើយអង្គុយប្រជុំ។

គួរបញ្ជាក់ថា កិច្ចចរចាបទឈប់បាញ់ដោយប្រយោល រវាងអ៊ីស្រាអែល និងក្រុមសកម្មប្រយុទ្ធហាម៉ាសប៉ាឡេស្ទីន នៅទីក្រុង Doha ប្រទេសកាតា បានបញ្ចប់ទៅដោយគ្មានការទម្លាយភាពទាល់ច្រក កាលពីសប្តាហ៍មុន ដោយភាគីទាំង២ បានទម្លាក់កំហុសដាក់គ្នាទៅវិញទៅមក ចំពោះភាពជាប់គាំងនេះ និងគម្លាតដ៏ធំដែលនៅតែមាន លើបញ្ហាជាច្រើន ក្នុងនោះមានរួមទាំងកម្រិតនៃការដកទ័ពរបស់អ៊ីស្រាអែលផងដែរ។

កិច្ចប្រជុំនេះធ្វើឡើងស្របពេលដែលអ៊ីស្រាអែលប្រឈមនឹងសម្ពាធអន្តរជាតិកាន់តែខ្លាំងឡើងៗ ពាក់ព័ន្ធនឹងតំបន់ហ្កាហ្សា ដោយប្រទេសកាណាដាជាមហាអំណាចលោកខាងលិចចុងក្រោយគេ ដែលនិយាយថា ខ្លួននឹងទទួលស្គាល់រដ្ឋប៉ាឡេស្ទីន៕