បន្ទាយមានជ័យ៖ នារសៀលថ្ងៃទី៣១ ខែកក្កដា ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានចុះសួរសុខទុក្ខ និងពិនិត្យការស្នាក់នៅរបស់ជនភៀសសឹកជាង១ពាន់គ្រួសារ ក្នុងស្រុកអូរជ្រៅ ខេត្តបន្ទាមានជ័យ។ 

ការចុះពិនិត្យនេះមានការចូលរួមពី ឯកឧត្តម អ៊ុ រាត្រី អភិបាលខេត្តបន្ទាយមានជ័យ, ក្រុមការងាររាជរដ្ឋាភិបាលចុះជួយស្រុកអូរជ្រៅ, មន្ទីរពាក់ព័ន្ធ និងអាជ្ញាធរមូលដ្ឋាន ជាច្រើនរូប។

អំឡុងពេលចុះសួរសុខទុក្ខនោះ ឯកឧត្តម ទេសរដ្ឋមន្រ្តី សូមកោតសរសើរដល់ការខិតខំប្រឹងប្រែងរបស់ ឯកឧត្តម កែ គឹមយ៉ាន, ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ, រដ្ឋបាលខេត្ត អាជ្ញាធរមូលដ្ឋាន និងក្រុមការងាររាជរដ្ឋាភិបាលចុះជួយខេត្តបន្ទាយមានជ័យ ដឹកនាំដោយ ព្រមទាំងអាជ្ញាធរ និងកងកម្លាំងគ្រប់ជាន់ថ្នាក់ ក្នុងការសម្របសម្រួល និងដោះស្រាយជាយកចិត្តទុកដាក់ពីសុខទុក្ខរបស់ជនភៀសសឹកឱ្យទទួលបានការស្នាក់នៅបណ្តោះអាសន្នមួយយ៉ាងសមរម្យ។

ឯកឧត្តម ទេសរដ្ឋមន្រ្តី បានថ្លែងអំណរគុណយ៉ាងជ្រាលជ្រៅចំពោះ សម្តេចធិបតី ហ៊ុន ម៉ាណែត ប្រមុខរាជរដ្ឋាភិបាល ដែលបានផ្តល់អំណោយ គ្រឿងឧបភោគ បរិភោគ តង់ និងសម្ភារៈជាច្រើន បូករួមជាមួយអំណោយពីសប្បុរសជន បានជួយឱ្យការរៀបចំមណ្ឌលសុវត្ថិភាពគ្រប់ទីតាំង មានស្បៀងគ្រប់គ្រាន់។

ក្នុងពេលសាកសួរសុខទុក្ខជាមួយជនភៀសសឹក ឯកឧត្តម ទេសរដ្ឋមន្រ្តី បានថ្លែងថា ផ្អែកតាមសភាពការណ៍តាមបន្ទាត់ព្រំដែនមានការឯកភាពគ្នារវាងរាជរដ្ឋាភិបាលកម្ពុជា និងរាជរដ្ឋាភិបាលថៃកាលពីថ្ងៃទី២៨ ខែកក្កដា ឆ្នាំ២០២៥ បងប្អូនជនភៀសសឹកនឹងអាចត្រឡប់ទៅលំនៅដ្ឋានវិញឆាប់ៗ ដើម្បីធ្វើយ៉ាងណាឱ្យជីវភាពប្រជាពលរដ្ឋវិលទៅប្រក្រតី។

នាឱកាសនោះដែរ ឯកឧត្តម ទេសរដ្ឋមន្រ្តី បានពាំនាំការផ្ដាំសួរសុខទុក្ខ និងកោតសរសើរពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនថ្នាក់ដឹកនាំ និងវីរកងទ័ពទាំងអស់ ដែលកំពុងបំពេញភារកិច្ចយ៉ាងអង់អាចក្លាហាន មោះមុតការពារបូរណភាពទឹក និងដី​​ដែនអធិបតេយ្យភាពកម្ពុជា៕