ណាតូ៖ អង្គការណាតូបាននិយាយកាលពីថ្ងៃពុធម្សិលមិញថា ខ្លួនមានឆន្ទៈក្នុងការពិភាក្សាជាមួយរុស្ស៊ីទាក់ទងនឹងការគ្រប់គ្រងអាវុធ និងការដាក់ពង្រាយមីស៊ីលដើម្បីកែប្រែការប្រឈមនៃការផ្ទុះសង្គ្រាមក្នុងតំបន់អឺរ៉ុប ប៉ុន្តែទីក្រុងមូស្គូបាននិយាយថា ស្ថានភាពគ្រោះថ្នាក់ខ្លាំងណាស់ ហើយផ្លូវឆ្ពោះទៅមុខមិនច្បាស់លាស់។
តំបន់ឈូងសមុទ្រនៅចន្លោះទីតាំងរបស់រុស្ស៊ី និងសហរដ្ឋអាមេរិក និងសម្ព័ន្ធមិត្តរបស់ខ្លួនបានលេចចេញជារូបរាងមិនធ្លាប់មាន បន្ទាប់ពីការចរចារយៈពេល ៤ម៉ោងនៅទីក្រុងព្រូសែលដែលជាការប៉ុនប៉ងលើកទី២ នៅសប្ដាហ៍នេះដើម្បីទម្លាយវិបត្តិដែលបង្ករឡើងដោយការប្រមូលផ្ដុំកងទ័ពរុស្ស៊ីដ៏ច្រើននៅជិតអ៊ុយក្រែន។ អគ្គលេខាធិការអង្គការណាតូ លោក Jens Stoltenberg បាននិយាយថា សម្ព័ន្ធណាតូមានឆន្ទៈក្នុងការរៀបចំការពិភាក្សាស្ដីពីការគ្រប់គ្រងអាវុធ ប៉ុន្តែនឹងមិនអនុញ្ញាតិឲ្យក្រុងម៉ូស្គូវ៉េតូមហិច្ឆិតារបស់អ៊ុយក្រែន ក្នុងការចូលជាសមាជិករបស់ណាតូដែលរុស្ស៊ីតែងតែច្រានចោលនោះឡើយ។
លោក Stoltenberg បានប្រាប់សន្និសីទសារព័ត៌មានថា មានការប្រឈមដ៏ពិតប្រាកដសម្រាប់ជម្លោះអាវុធថ្មីនៅអឺរ៉ុប។ លោកថា មានការខ្វែងគំនិតគ្នារវាងសម្ព័ន្ធណាតូ និងរុស្ស៊ី។ ការខ្វែងគំនិតគ្នារបស់យើងនឹងមិនងាយដោះស្រាយនោះទេ។ អង្គការណាតូ និងសហរដ្ឋអាមេរិកបានច្រានចោលការទាមទារដ៏សំខាន់របស់រុស្ស៊ី ចំពោះការបន្ធូរបន្ថយភាពតានតឹងជុំវិញវិបត្តិអ៊ុយក្រែន ប៉ុន្តែបានបើកចំហរពីលទ្ធភាពនៃការចរចានាពេលអនាគតជាមួយក្រុងមូស្គូស្ដីពីការគ្រប់គ្រងអាវុធ ការដាក់ពង្រាយមីស៊ីល និងវិធីទប់ស្កាត់ឧបទ្ទវហេតុយោធារវាងរុស្ស៊ី និងបណ្ដាប្រទេសលោកខាងលិច។ យ៉ាងណាក៏ដោយកិច្ចប្រជុំណាតូ-រុស្ស៊ីគ្មានជំហានរីកចម្រើនទេ ស្របពេលមានការប្រឈមពិតប្រាកដនៃសង្គ្រាមអ៊ុយក្រែននោះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
