ប្រទេសឥណ្ឌា កាលពីថ្ងៃព្រហស្បតិ៍ (៣១ កក្កដា) បានប្តេជ្ញាការពារវិស័យកសិកម្មពឹងផ្អែកលើកម្លាំងពលកម្មរបស់ខ្លួន ដែលជាចំណុចស្នូលដ៏សំខាន់មួយក្នុងកិច្ចចរចាពាណិជ្ជកម្មដែលជាប់គាំងជាមួយសហរដ្ឋអាមេរិក ខណៈទីក្រុងវ៉ាស៊ីនតោន បានគំរាមដំឡើងពន្ធ ២៥% ដែលបង្កឱ្យមានកំហឹងពីក្រុមប្រឆាំង និងការធ្លាក់ចុះនៃប្រាក់រូពីឥណ្ឌា។

ប្រសិនបើពុំមានកិច្ចព្រមព្រៀងទេ អត្រានេះនឹងចូលជាធរមានចាប់ពីថ្ងៃសុក្រ ទី០១ ខែសីហានេះ ហើយនិងធ្វើឱ្យឥណ្ឌាជួបលក្ខខណ្ឌពាណិជ្ជកម្មធ្ងន់ធ្ងរជាងដៃគូរសំខាន់ៗផ្សេងទៀតរបស់អាមេរិក ដែលអាចធ្វើឱ្យខូចសេដ្ឋកិច្ចនៃដៃគូយុទ្ធសាស្ត្ររបស់ទីក្រុងវ៉ាស៊ីនតោននៅអាស៊ីមួយនេះ។ យ៉ាងណាមិញ សេតវិមានបានបញ្ជាក់នៅថ្ងៃព្រហស្បតិ៍ដដែលនេះថា អត្រាពន្ធថ្មីនេះនឹងចាប់អនុវត្តពីថ្ងៃទី០៧ សីហា សប្ដាហ៍ក្រោយ ពុំមែននៅកាលបរិច្ឆេទកំណត់ថ្ងៃសុក្រ ០១ សីហា នេះ ដូចការរំពឹងទុកនោះទេ។

រដ្ឋមន្ត្រីក្រសួងពាណិជ្ជកម្មឥណ្ឌា លោក Piyush Goyal បាននិយាយប្ដេជ្ញាក្នុងសេចក្តីថ្លែងការណ៍មួយថា "រដ្ឋាភិបាលយកចិត្តទុកដាក់បំផុតចំពោះការការពារ និងលើកកម្ពស់សុខុមាលភាពរបស់កសិករ សហគ្រិន និងទាំងអាជីវកម្មខ្នាតតូច និងមធ្យម"។ រដ្ឋមន្ត្រីក្រសួងរតនាគារអាមេរិក លោក Scott Bessent បាននិយាយថា ក្រុមពាណិជ្ជកម្មអាមេរិក មានការខកចិត្តជាមួយឥណ្ឌាណាស់ ដោយបន្ថែមថា អនាគតនៃកិច្ចព្រមព្រៀងពាណិជ្ជកម្មរវាងប្រទេសទាំងពីរ ឥឡូវនេះគឺអាស្រ័យលើឥណ្ឌា។

ប្រធានាធិបតីអាមេរិក លោក Donald Trump បាននិយាយកាលថ្ងៃពុធថា បន្ថែមពីលើពន្ធ ២៥% លើការនាំចូលពីឥណ្ឌា ប្រទេសនេះក៏នឹងប្រឈមនឹងការពិន័យមិនជាក់លាក់ ដោយសារទំនាក់ទំនងរបស់ខ្លួនជាមួយរុស្ស៊ី និងសមាជិកភាពរបស់ខ្លួននៅក្នុងក្រុមប្រទេសសកលខាងត្បូង BRICS ។

ទោះបីជាកិច្ចចរចាកំពុងបន្តក៏ដោយ ក៏ការពិភាក្សាទាំងនោះកំពុងជាប់គាំងដោយសារតែការទទូចរបស់ អាមេរិក ឱ្យឥណ្ឌា បើកទូលាយទីផ្សារកសិកម្មរបស់ខ្លួន។ ទីក្រុងញូវដែលី បានការពារវិស័យនេះជាយូរមកហើយ - ដោយមានកម្លាំងពលកម្មជាង ៤០% ចូលរួមក្នុងសកម្មភាពកសិកម្ម - ដែលបានក្លាយជាប្លុកបោះឆ្នោតដ៏មានឥទ្ធិពលបំផុតនៅឥណ្ឌា ដែលមានប្រជាជនច្រើនបំផុតរបស់ពិភពលោក៕