ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍សប្ដាហ៍នេះ បានរិះគន់អតីតប្រធានាធិបតីរុស្ស៊ី និងបច្ចុប្បន្នជាអនុប្រធាននៃក្រុមប្រឹក្សាសន្តិសុខរុស្ស៊ីលោកDmitry Medvedev ដោយព្រមានថាឱ្យប្រយ័ត្នសម្ដី បន្ទាប់ពីលោកMedvedevគំរាមពីសង្រ្គាម ជុំវិញជម្លោះអ៊ុយក្រែន។

លោក Trump បានសរសេរនៅលើប្រព័ន្ធទំនាក់ទំនងសង្គម Truth Social ថា យើងសូមប្រាប់លោក Medvedev ជាអតីតប្រធានាធិបតីរុស្ស៊ីដែលបរាជ័យ ដែលគិតថាខ្លួនឯងនៅតែជាប្រធានាធិបតី ឱ្យប្រយ័ត្នសម្ដី ។លោកកំពុងចូលទៅក្នុងទឹកដីដ៏គ្រោះថ្នាក់ណាស់។

លោក Medvedev ដែលបានរិះគន់លោក Trump កាលពីថ្ងៃចន្ទដើមសប្ដាហ៍នេះ ព្រមានថា សម្ពាធកាន់តែខ្លាំងរបស់លោក Trump លើវិមានក្រឹមឡាំង ជុំវិញសង្គ្រាមនៅអ៊ុយក្រែន បង្កហានិភ័យដល់ជម្លោះកាន់តែរីកធំ មិនត្រឹមតែរវាងរុស្ស៊ី និងអ៊ុយក្រែនប៉ុណ្ណោះទេ ប៉ុន្តែរវាងរុស្ស៊ី និងសហរដ្ឋអាមេរិកផងដែរ។

លោក Medvedev បាននិយាយនៅលើបណ្ដាញសង្គម X "ការទុករយៈពេល៥០ថ្ងៃ ឬ១០ថ្ងៃ ឲ្យរុស្ស៊ី លោកគួរតែចងចាំទុករឿង២៖ទី១រុស្ស៊ីមិនមែនជាអ៊ីស្រាអែលឬសូម្បីតែអ៊ីរ៉ង់។ទី២ ឱសានវាទថ្មីនីមួយៗគឺជាការគំរាមកំហែងនិងជំហានឆ្ពោះទៅរកសង្រ្គាម។ មិនមែនរវាងរុស្ស៊ីនិងអ៊ុយក្រែនទេ ប៉ុន្តែជាមួយប្រទេសរបស់លោកខ្លួនឯង។ កុំដើតាមផ្លូវ Sleepy Joe!" ។

ការអត្ថាធិប្បាយរបស់លោក Medvedev បានធ្វើឡើងបន្ទាប់ពីលោក Trump កាលពីថ្ងៃចន្ទបានគំរាម ប្រទេសរុស្ស៊ីដោយការដាក់ទណ្ឌកម្ម និងពន្ធបន្ទាប់បន្សំ ប្រសិនបើមិនបញ្ចប់សង្រ្គាមអ៊ុយក្រែនក្នុងរយៈពេលប្រហែល១០ ឬ ១២ ថ្ងៃ លឿនជាងកាលបរិច្ឆេទកំណត់ពីមុន៕