ចក្រភពអង់គ្លេស និងប្រទេសសម្ព័ន្ធមិត្តចំនួន១៣ផ្សេងទៀតរួមមានទាំងសហរដ្ឋអាមេរិក និងបារាំង បានថ្កោលទោស នូវអ្វីដែលប្រទេសទាំងអស់នេះចាត់ទុកថាជាការកើនឡើងផែនការធ្វើឃាត ការចាប់ពង្រត់ និងការយាយីធ្វើឡើងដោយអង្គភាពសេវាចារកម្មអ៊ីរ៉ង់ដែលដាក់គោលដៅលើបុគ្គលនៅអឺរ៉ុប និងនៅអាមេរិកខាងជើង។

ប្រទេសទាំងអស់បាននិយាយនៅក្នុងសេចក្តីថ្លែងការណ៍រួមថា «យើងរួបរួមគ្នាប្រឆាំងចំពោះការប៉ុនប៉ងរបស់អង្គភាពសេវាចារកម្មអ៊ីរ៉ង់ដើម្បីសម្លាប់ ចាប់ពង្រត់ និងធ្វើទុក្ខបុកម្នេញប្រជាជននៅអឺរ៉ុប និងនៅអាមេរិកខាងជើង ក្នុងការរំលោភយ៉ាងច្បាស់លាស់លើដែនអធិបតេយ្យភាពរបស់យើង»។

រដ្ឋាភិបាលប្រទេសអាល់បានី អូទ្រីស បែលហ្ស៊ិក កាណាដា ឆេក ដាណឺម៉ាក ហ្វាំងឡង់ បារាំង អាល្លឺម៉ង់ ហូឡង់ អេស្ប៉ាញ ស៊ុយអែត ចក្រភពអង់គ្លេស និងសហរដ្ឋអាមេរិក បានអំពាវនាវឱ្យអាជ្ញាធរអ៊ីរ៉ង់ បញ្ឈប់សកម្មភាពខុសច្បាប់បែបនេះជាបន្ទាន់។

ប្រទេសទាំងអស់បាននិយាយថា សកម្មភាពបែបនេះត្រូវបានអនុវត្តកាន់តែខ្លាំងឡើងក្នុងការសហការជាមួយបណ្តាញឧក្រិដ្ឋកម្មអន្តរជាតិ។ ចាប់តាំងពីដើមឆ្នាំ២០២២មក ចក្រភពអង់គ្លេសបាននិយាយថា ខ្លួនបានបង្អាក់ផែនការដែលទាក់ទងជាមួយប្រទេសអ៊ីរ៉ង់ជាង២០លើកចំពោះករណីចាប់ពង្រត់ ឬសម្លាប់បុគ្គលនៅអង់គ្លេស រួមទាំងជនជាតិអង់គ្លេស និងអ្នកដទៃទៀតដែលទីក្រុងតេអេរ៉ង់ចាត់ទុកជាការគំរាមកំហែង។