ប្រទេសប្រេស៊ីល កាលពីថ្ងៃព្រហស្បតិ៍ (៣១ កក្កដា) បានសម្ដែងការធូរចិត្តខ្លះដែលវិស័យសំខាន់ៗមួយចំនួនរបស់ខ្លួនត្រូវបានដកចេញពីពន្ធដ៏ធ្ងន់ ៥០% របស់សហរដ្ឋអាមេរិក ហើយនឹងប្រឹងប្រែងចរចាកាន់តែម៉ឺងម៉ាត់ថែមទៀត ប៉ុន្តែក៏បានប្តេជ្ញាថានឹងតតាំងនឹងពន្ធគយដ៏ធំសម្បើមរបស់លោកប្រធានាធិបតីអាមេរិក Donald Trump លើការនាំចេញរបស់ខ្លួន ដោយនិយាយថា ប្រេស៊ីលមានបំណងដាក់បណ្តឹង ប្រសិនបើការចរចាចុងក្រោយបរាជ័យ។

រដ្ឋមន្ត្រីក្រសួងហិរញ្ញវត្ថុប្រេស៊ីល លោក Fernando Haddad បាននិយាយថា ពន្ធគយដែលបានប្រកាសរបស់អាមេរិកគឺ "អំណោយផល" ជាងការរំពឹងទុក ជាមួយនឹងផលិតផលនាំចេញសំខាន់ៗមួយចំនួនត្រូវបានលើកលែង។ លោកបន្តថា ទោះយ៉ាងនេះក្ដី "នៅតែមានភាពអយុត្តិធម៌ជាច្រើននៅក្នុងវិធានការដែលបានប្រកាសនោះ"។

ប្រធានាធិបតីប្រេស៊ីល លោក Luiz Inacio Lula da Silva បានរិះគន់ពន្ធគយដ៏ខ្ពស់នេះថាជាការវាយប្រហារលើ "អធិបតេយ្យភាព" របស់ប្រទេសលោក។ អនុប្រធានាធិបតីប្រេស៊ីល លោក Geraldo Alckmin និយាយថា ប្រេស៊ីលកំពុងវាយតម្លៃការបន្ធូរបន្ថយលើវិស័យសំខាន់មួយចំនួនពីរបាំងពាណិជ្ជកម្មអាមេរិក ហើយប្រជាជាតិអាមេរិកខាងត្បូងមួយនេះ នឹងបន្តចរចាលក្ខខណ្ឌពាណិជ្ជកម្មទ្វេភាគីកាន់តែល្អប្រសើរជាងនេះជាមួយទីក្រុងវ៉ាស៊ីនតោន។

គួរឱ្យដឹងថា លោក Trump កាលពីថ្ងៃពុធសប្ដាហ៍នេះ បានចុះហត្ថលេខាលើក្រឹត្យមួយ ដោយបន្ថែមពន្ធ ៤០% លើផលិតផលប្រេស៊ីល ដែលនាំមកនូវពន្ធលើពាណិជ្ជកម្មសរុបលើទំនិញប្រេស៊ីលឡើងដល់ ៥០%។ ការយកពន្ធនេះប៉ះពាល់ដល់កាហ្វេ និងសាច់ ជាផលិតផលដ៏សំខាន់ដែលប្រេស៊ីលជាប្រទេសនាំចេញកំពូលរបស់ពិភពលោក៕