ទោចក្រយាន៖ ការប្រកួតកីឡាទោចក្រយានជ្រើសរើសជើងឯកថ្នាក់ជាតិឆ្នាំ២០២១ ដែលរៀបចំការប្រកួត ១ថ្ងៃពេញកាលពីថ្ងៃទី១២ ខែមករា ឆ្នាំ២០២២ នៅខេត្តសៀមរាបបានបញ្ចប់ជោគជ័យ ក្រោមកិច្ចសហការយ៉ាងល្អពីអាជ្ញាធរខេត្ត និងដៃគូសហការ ពិសេសការប្រកួតប្រជែងកម្រិតខ្ពស់របស់កីឡាករ-កីឡាការិនី។
លោក នូ ចំរើន អគ្គលេខាធិការសហព័ន្ធខ្មែរកីឡាទោចក្រយានបានឲ្យដឹងថា ព្រឹត្តិការណ៍ប្រចាំឆ្នាំនេះមានប្រតិភូ គ្រូបង្វឹក និងកីឡាករ-កីឡាការិនីសរុប ២៤៩នាក់ក្នុងនោះមានកីឡាករ ១៧៩នាក់ និងកីឡាការិនី ១៩នាក់ រួមទាំងមន្ត្រីគណៈកម្មការរៀបចំការប្រកួតចំនួន ៧០នាក់ដែលបានធ្វើការប្រកួតលើ ៧វិញ្ញាសា។ ចំពោះលទ្ធផលនៃការប្រកួតវិញ្ញាសានីមួយៗ រួមមានវិញ្ញាសាកង់គួកបុរសថ្នាល លេខ១ កីឡាករ ចេង ជេម, វិញ្ញាសាកង់គួកបុរសឈុតធំ លេខ១ កីឡាករ លឹម តិចហ៊ុយ, វិញ្ញាសាកង់គួកបុរស លេខ១ កីឡាករ អេង លីន។ រីឯប្រភេទកង់ភ្នំ វិញ្ញាសាកង់ភ្នំ Man Master MTB លេខ១ កីឡាករ Vasco Ramsperger, វិញ្ញាសាកង់ភ្នំបុរស លេខ១ កីឡាករ ឃឹម ម៉េងឡុង, វិញ្ញាសាកង់ភ្នំថ្នាល លេខ១ កីឡាករ ធីម លីម៉េង និងវិញ្ញាសាកង់ភ្នំនារី លេខ១ កីឡាការិនី ខេន ម៉ាឡៃ។
អគ្គលេខាធិការសហព័ន្ធដដែលបន្ដថា ឆ្លងកាត់ការប្រកួតដោយស្មារតីយកចិត្តទុកដាក់ ខិតខំប្រឹងប្រែងអស់ពីសមត្ថភាព បច្ចេកទេស និងអនុវត្តបានល្អនូវស្មារតីសាមគ្គីភាព មិត្តភាព ព្រមទាំងអនុវត្តបានយ៉ាងល្អនូវគោលការណ៍លេងដោយយុត្តិធម៌ (Fair Play) បានជំរុញឲ្យការប្រកួតនេះទទួលបានលទ្ធផលល្អប្រសើរ។ ក្នុងនោះលោកក៏បានថ្លែងអំណរគុណអាជ្ញាធរខេត្តសៀមរាប ដែលបានសម្រួលទីតាំងរៀបចំ និងចរាចរណ៍ធ្វើឲ្យការប្រកួតដំណើរការយ៉ាងរលូនផងដែរ។ ថ្លែងក្នុងពិធីបិទការប្រកួត ឯកឧត្តម កឹម សុខុន រដ្ឋលេខាធិការក្រសួងពាណិជ្ជកម្ម និងជាអនុប្រធានសហព័ន្ធបានធ្វើការវាយតម្លៃខ្ពស់ និងកោតសរសើរចំពោះការចូលរួម និងខិតខំប្រឹងប្រែងអស់ពីសមត្ថភាពទាំងកីឡាករ-កីឡាការិនី និងមន្ដ្រីបច្ចេកទេស ដើម្បីជំរុញឲ្យការប្រកួតជើងឯកថ្នាក់ជាតិទទួលបានជោគជ័យ ដើម្បីបន្តការអភិវឌ្ឍទាំងគុណភាពបច្ចេកទេសរបស់អត្តពលិក និងគណៈកម្មការជំនាញ ត្រៀមឆ្ពោះទៅទទួលរៀបចំធ្វើជាម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣ ដែលប្រភេទកីឡាទោចក្រយាននឹងត្រូវរៀបចំការប្រកួតនៅខេត្តសៀមរាបផ្ទាល់តែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
