តំណាងទីភ្នាក់ងារជនភៀសខ្លួនរបស់អង្គការសហប្រជាជាតិប្រចាំប្រទេសលីបង់ បាននិយាយកាលពីថ្ងៃព្រហស្បតិ៍ថា លោកសង្ឃឹមថា យ៉ាងហោចណាស់ជនភៀសខ្លួនស៊ីរី ២០០.000នាក់ បានវិលត្រឡប់ពីប្រទេសលីបង់ វិញនៅចុងឆ្នាំនេះ ក្រោមផែនការវិលត្រឡប់ ដែលគាំទ្រដោយរដ្ឋាភិបាលថ្មី។

តំណាងជិតផុតអាណត្តិរបស់ UNHCR ប្រចាំប្រទេសលីបង់ លោក Ivo Freijsen បានថ្លែងថា មុនពេលអតីតប្រធានាធិបតីលោក បាសា អាល់អាសាដ ( Bashar al-Assad) ត្រូវបានគេបណ្តេញចេញពីអំណាច ដោយសារការវាយលុកយ៉ាងឆាប់រហ័សរបស់ក្រុមឧទ្ទាម នៅក្នុងខែធ្នូ មានតែជនភៀសខ្លួនស៊ីរីប្រហែល ១% នៅក្នុងប្រទេសលីបង់ បាននិយាយថា ពួកគេគ្រោង នឹងវិលត្រឡប់មកវិញ។

លោក Freijsen បានប្រាប់សារព័ត៌មាន AP នៅក្នុងបទសម្ភាសន៍មួយថា៖«ស្ថានភាពនេះ បានផ្លាស់ប្តូរឥឡូវនេះ...គឺ ២៤ភាគរយនៃសហគមន៍ជនភៀសខ្លួនស៊ីរី នៅក្នុងប្រទេសលីបង់ឥឡូវនេះ កំពុងគិតឬគ្រោងនឹងត្រឡប់ទៅវិញ ក្នុងអំឡុងពេល ១២ខែបន្ទាប់។ ដូច្នេះ នេះ គឺជាការផ្លាស់ប្តូរវិជ្ជមានមួយ។

ការបះបោរប្រែក្លាយជម្លោះនៅប្រទេសស៊ីរី បានផ្លាស់ទីលំនៅពាក់កណ្តាលនៃប្រជាជនមុនសង្គ្រាមចំនួន ២៣ លាននាក់របស់ប្រទេសនេះ ក្នុងរយៈពេល ១៤ឆ្នាំចុងក្រោយនេះ។ ប្រទេសលីបង់ បានធ្វើជាម្ចាស់ផ្ទះទទួលជនភៀសខ្លួនប្រមាណ១,៥លាននាក់ ដែលស្មើនឹងមួយភាគបួននៃប្រជាជនលីបង់ចំនួន ៦លាននាក់ នៅចំណុចមួយ។ មន្ត្រីបានប៉ាន់ប្រមាណថា យ៉ាងហោចណាស់មានជនភៀសខ្លួន ១ លាននាក់ នៅតែស្ថិតក្នុងប្រទេសនេះ សព្វថ្ងៃនេះ។