លោកប្រធានាធិបតី Donald Trump បានបើកចំហនូវលទ្ធភាពនៃកិច្ចព្រមព្រៀងពាណិជ្ជកម្មបន្ថែមទៀត ហើយក៏បានសាទរពន្ធបដិការថ្មីដ៏ច្រើនសន្ធឹកសន្ធាប់លើការនាំចូល ដែលលោកបានដាក់លើដៃគូពាណិជ្ជកម្មទូទាំងពិភពលោក កាលពីយប់ថ្ងៃព្រហស្បតិ៍ (៣១ កក្កដា) ដោយប្រាប់ទូរទស្សន៍ NBC News នៅក្នុងបទសម្ភាសន៍តាមទូរសព្ទថា អ្វីៗដំណើរការទៅមុខ "ល្អណាស់ រលូនណាស់"។

ខណៈដែលពេលផុតកំណត់សម្រាប់កិច្ចព្រមព្រៀងពាណិជ្ជកម្មជិតមកដល់ លោក Trump បាននិយាយថា ពេលនេះគឺ "យឺតពេលហើយ" សម្រាប់ប្រទេសផ្សេងទៀតក្នុងការចៀសវាងអត្រាពន្ធដែលនឹងចាប់ផ្ដើមនៅសប្តាហ៍ក្រោយនេះ បន្ទាប់ពីលោកបានចុះហត្ថលេខាលើក្រឹត្យមួយដើម្បីផ្ដល់ភាពផ្លូវការដល់អត្រាពន្ធបដិការថ្មី។

យ៉ាងណាមិញ ប្រធានាធីបតីរូបនេះបន្ថែមថា លោកនឹងនៅតែបើកចំហជានិច្ចចំពោះសំណើផ្តល់ជូនដ៏គួរឱ្យទាក់ទាញនាពេលខាងមុខ ហើយថា សហរដ្ឋអាមេរិកអាចធ្វើកិច្ចព្រមព្រៀងបន្ថែមទៀត។

កាលពីល្ងាចថ្ងៃព្រហស្បតិ៍ លោក Trump បានចុះហត្ថលេខាលើក្រឹត្យមួយ ដែលកំណត់ពន្ធចាប់ពី ១០% ទៅ ៤១% លើការនាំចូលរបស់ពីប្រទេស និងដែនដីរាប់សិបទូទាំងពិភពលោក។ សេតវិមានបញ្ជាក់ថា ការអនុវត្តពន្ធថ្មីនេះនឹងចាប់ផ្ដើមក្នុងពេល ១សប្តាហ៍បន្ទាប់ ពុំមែនថ្ងៃសុក្រ ០១ សីហា ដូចដែលរំពឹងទុកពីមុននោះទេ។

កញ្ចប់ពន្ធបដិការថ្មីដែលត្រូវបានប្រកាសដំបូងបំផុតនៅក្នុងខែមេសានេះ គឺជាផ្នែកមួយនៃកញ្ចប់ដែលលោក Trump បានដាក់ពន្ធមូលដ្ឋានអប្បបរមា ១០% លើទំនិញពីដៃគូពាណិជ្ជកម្មស្ទើរតែទាំងអស់ - ដោយលើកឡើងពីការអនុវត្តពាណិជ្ជកម្មមិនយុត្តិធម៌៕