ប្រភពអ៊ីស្រាអែលដែលដឹងពីស្ថានភាពនៅប៉ុស្តិ៍ត្រួតពិនិត្យ Kerem Shalom ខាងប៉ាឡេស្ទីន  បានប្រាប់ទីភ្នាក់ងារសារព័ត៌មាន TASSថា អ៊ីស្រាអែលបានអនុញ្ញាតឲ្យរថយន្តដឹកជំនួយមនុស្សធម៌ប្រហែល ៥.000គ្រឿង ចូលទៅក្នុងតំបន់ហ្កាហ្សាស្ទ្រីប ចាប់តាំងពីថ្ងៃទី ១៩ ខែឧសភា។

ប្រភពនោះ បាននិយាយថា៖«ចាប់តាំងពីថ្ងៃទី ១៩ ខែឧសភា រថយន្តដឹកជំនួយមនុស្សធម៌ចំនួន ៥.000 គ្រឿង បានចូលទៅក្នុងតំបន់ហ្កាហ្សាស្ទ្រីប» ដោយបន្ថែមថា ជំនួយទាំងនោះ រួមមានអាហារទារកចំនួន ៤.000តោន។ «ពុំមានគ្រោះទុរ្ភិក្ស នៅតំបន់ហ្សាស្ទ្រីបទេ ការអះអាងអំពីទុរ្ភិក្ស គឺជាការនិទានរឿងឃោសនា និងយុទ្ធនាការកុហកដោយក្រុមសកម្មប្រយុទ្ធមកពី [ចលនាប៉ាឡេស្ទីន]ហាម៉ាស។ អង្គការសហប្រជាជាតិ និងអង្គការអន្តរជាតិ គួរតែធ្វើការឲ្យសកម្មបន្ថែមទៀត ដើម្បីផ្តល់ជំនួយមនុស្សធម៌ដោយផ្ទាល់ ដល់ជនស៊ីវិលនៅតំបន់ហ្កាហ្សា» ខណៈពេលដែលធានាថា «ជំនួយមិនធ្លាក់ចូលក្នុងដៃក្រុមហាម៉ាស»ទេ។

យោងតាមអ៊ីស្រាអែល ក្នុងសប្តាហ៍នេះ អង្គការសហប្រជាជាតិ និងអង្គការអន្តរជាតិបានទទួល «រថយន្តជំនួយមនុស្សធម៌ប្រហែល ១.000គ្រឿង នៅឯប៉ុស្តិ៍ត្រួតពិនិត្យជាច្រើន នៅតាមព្រំដែននៃដែនដីប៉ាឡេស្ទីន និងរដ្ឋជ្វីហ្វ ដែល«ត្រូវបានចែកចាយពាសពេញតំបន់ហ្កាហ្សាស្ទ្រីប»។ រថយន្តដឹកជំនួយរាប់រយគ្រឿង ស្ថិតនៅប៉ុស្តិ៍ត្រួតពិនិត្យ ដោយរង់ចាំតំណាងអង្គការអន្តរជាតិ ដែលគេសន្មតថា មកយកពួកវាទាំងអស់នេះ។

ប្រភពរបស់សារព័ត៌មាន TASS បានកត់សម្គាល់ថា ជាឧទាហរណ៍ នៅប៉ុស្តិ៍ត្រួតពិនិត្យ Kerem Shalom ទំនិញដែលដឹកជញ្ជូនដោយរថយន្តចំនួន ៨០០គ្រឿង នៅតែមិនត្រូវបានបែងចែក។ ប្រភពនេះ បានបន្ថែមថា រថយន្តដឹកទំនិញប្រហែល ២០០គ្រឿង ដែលមានជំនួយមនុស្សធម៌ថ្មី ត្រូវបានគេរំពឹងថា នឹងមកដល់តំបន់ហ្កាហ្សា ជារៀងរាល់ថ្ងៃ។