សហរដ្ឋអាមេរិក បានដាក់ចេញនូវអត្រាពន្ធបដិការសកលថ្មី ដែលមើលឃើញប្រទេសនានាទូទាំងពិភពលោកប្រឈមនឹងអត្រាពន្ធគយខ្ពស់ៗនៅខែសីហានេះ ក្នុងអ្វីដែលលោកប្រធានាធិបតីអាមេរិក Donald Trump និយាយថានឹងបង្កើតប្រាក់ចំណូលរាប់ពាន់លានដុល្លារ។ យ៉ាងណាមិញ អត្ថបទពីសារព័ត៌មាន BBC និយាយថា ពលរដ្ឋអាមេរិក អាចនឹងចំណាយកាន់តែច្រើនលើផលិតផលមួយចំនួន។

BBC និយាយថា តម្លៃខ្ពស់ទាំងនោះនឹងដាក់លើសម្លៀកបំពាក់ និងស្បែកជើង ដោយសារភាគច្រើននៃមុខទំនិញទាំងនេះក្នុងសហរដ្ឋអាមេរិក គឺផលិតនៅប្រទេសផ្សេង រួមទាំងមជ្ឈមណ្ឌលផលិតរបស់វៀតណាម ចិន និងបង់ក្លាដែសជាដើម។ ពន្ធកំពុងដាក់សម្ពាធលើហាងធំៗរបស់អាមេរិកដូចជា ហាងទំនិញ Target និង Walmart ជាទីដែលប្រជាជនអាមេរិក តែងទិញសម្លៀកបំពាក់ក្នុងតម្លៃសមរម្យ។

BBC បន្តថា កាហ្វេ ប្រេងអូលីវ និងអាហារផ្សេងៗទៀតក៏នឹងប៉ះពាល់ពីពន្ធផងដែរ ដោយកាហ្វេស្ទើរតែទាំងអស់ដែលប្រើប្រាស់នៅអាមេរិក គឺនាំចូលពីក្រៅប្រទេស។ ចំណែកស្រាបៀរ ស្រាក្រហម និងផលិតផលមានជាតិអាល់កុលផ្សេងទៀតក៏ជួបផលលំបាក ខណៈអាមេរិក គឺជាទីផ្សារនាំចូលគ្រឿងស្រវឹងដ៏ធំបំផុតមួយ។

សេចក្ដីរាយការណ៍បន្ថែមថា រថយន្តនៅអាមេរិក ក៏អាចមើលឃើញផលអវិជ្ជមានមួយចំនួន ដោយលោកប្រធានាធិបតី Donald Trump ហាក់ដាក់គោលដៅជាពិសេសលើយានយន្តនាំចូល។ រីឯលំនៅឋានក៏ជៀសមិនផុតដែរ បន្ទាប់ពីលោក Trump ដំឡើងពន្ធនាំចូលលើដែកថែប និងអាលុយមីញ៉ូម ដែលជាវត្ថុធាតុដើមសំខាន់បំផុតសម្រាប់សាងសង់ផ្ទះ។

អត្ថបទ BBC សង្កត់ធ្ងន់ថា ការចំណាយរបស់ពលរដ្ឋអាមេរិក លើថាមពលនិងប្រេងឥន្ធនៈក៏នឹងងើបឡើង ទោះជាកិច្ចព្រមព្រៀងអឺរ៉ុបនឹងបង្កើនបរិមាណថាមពលដែលអឺរ៉ុបទិញពីអាមេរិកក៏ដោយ ព្រោះថាពន្ធលើការនាំចូលពីក្រៅប្រទេសមិនមែនសុទ្ធតែល្អសម្រាប់អ្នកប្រើប្រាស់នោះទេ។ ជាពិសេសបន្ទាប់ពីពន្ធ ១០% លើថាមពលពីកាណាដា ដែលជាអ្នកផ្គត់ផ្គង់ប្រេងឆៅបរទេសធំជាងគេរបស់អាមេរិក៕