លោកប្រធានាធិបតី Donald Trump បាននិយាយថា បេសកជនបរទេសរបស់លោក លោកSteve Witkoff នឹងធ្វើដំណើរទៅកាន់ប្រទេសរុស្ស៊ីនៅប៉ុន្មានថ្ងៃខាងមុខនេះ ខណៈលោកប្រធានាធិបតី អំពាវនាវឱ្យបញ្ចប់ជម្លោះនៅអ៊ុយក្រែន។ លោក Trump បានបង្ហាញផែនការធ្វើដំណើរដែលពុំបានដឹងពីមុនរបស់ លោក Witkoff ក្នុងអំឡុងពេលព្រឹត្តិការណ៍មួយនៅឯសេតវិមានកាលពីរសៀលថ្ងៃព្រហស្បតិ៍ ជាកន្លែងដែលលោកបាននិយាយថា លោកមានផែនការអនុវត្តទណ្ឌកម្មថ្មីលើទីក្រុងមូស្គូ និងបានពណ៌នាការបន្តវាយលុករបស់រុស្ស៊ីលើទីក្រុងគីវ ថា «គួរឱ្យស្អប់ខ្ពើម»។

លោក Trump បាននិយាយនៅពេលត្រូវបានសួរអំពីដំណើរទស្សនកិច្ចបច្ចុប្បន្នរបស់ លោក Witkoff ទៅកាន់តំបន់មជ្ឈិមបូព៌ា ជាកន្លែងដែលលោកជួបជាមួយមន្ត្រីដើម្បីពិភាក្សាអំពីសង្គ្រាមរបស់អ៊ីស្រាអែលនៅតំបន់ហ្កាហ្សា ថា «លោកនឹងទៅប្រទេសរុស្ស៊ី ជឿឬមិនជឿ»។ ព័ត៌មានលម្អិតបន្ថែមអំពីដំណើរទស្សនកិច្ចនាពេលខាងមុខរបស់ លោក Witkoff មិនអាចដឹងភ្លាមៗនៅឡើយ។

ដំណើរទស្សនកិច្ចចុងក្រោយរបស់លោក Witkoff ទៅកាន់ប្រទេសរុស្ស៊ីគឺធ្វើឡើងកាលពីខែមេសា នៅពេលនោះលោកបានជួបប្រធានាធិបតី លោក Vladimir Putin នៅវិមានក្រឹមឡាំង។ ការចរចាទាំងនោះមិនបានទទួលលទ្ធផលនៃការទម្លាយភាពទាល់ច្រកភ្លាមៗក្នុងការនាំយកសង្រ្គាមនៅអ៊ុយក្រែនឲ្យដល់ទីបញ្ចប់ឡើយ។ ហើយចាប់តាំងពីពេលនោះមក ការខកចិត្តរបស់លោក Trump ចំពោះលោក Putin បានកើនឡើង ខណៈការរំពឹងទុកសម្រាប់សន្តិភាព ថយចុះ។

លោក Trump បានបញ្ចេញកំហឹងកាលពីថ្ងៃព្រហស្បតិ៍ នៅពេលដែលត្រូវបានចោទសួរអំពីការបាញ់ស្រោចមីស៊ីលនិងយានដ្រូនចុងក្រោយរបស់ទីក្រុងមូស្គូ ចូលទៅអ៊ុយក្រែន។ លោកនិយាយថា «ខ្ញុំគិតថាវាគួរឱ្យស្អប់ខ្ពើមនូវអ្វីដែលពួកគេកំពុងធ្វើ»។