រដ្ឋមន្ត្រីការបរទេសអ៊ីរ៉ង់និយាយថា សហរដ្ឋអាមេរិកត្រូវតែព្រមព្រៀងបង់ប្រាក់សំណងហិរញ្ញវត្ថុ មុនពេលការចរចាអាចត្រូវបានបន្តជុំវិញកម្មវិធីនុយក្លេអ៊ែររបស់ទីក្រុងតេអេរ៉ង់។ រដ្ឋមន្ត្រីការបរទេស លោក Abbas Araghchi បានអត្ថាធិប្បាយលើការបន្តចរចាដែលធ្វើទៅបានស្តីពីនុយក្លេអ៊ែរជាមួយសហរដ្ឋអាមេរិក នៅក្នុងបទសម្ភាសន៍មួយជាមួយសារព័ត៌មាន Financial Times ដែលបានចេញផ្សាយកាលពីថ្ងៃព្រហស្បតិ៍។

អ៊ីរ៉ង់ និងសហរដ្ឋអាមេរិក បានចាប់ផ្តើមពិភាក្សាគ្នាកាលពីខែមេសា ប៉ុន្តែការចរចាជាច្រើនលើកត្រូវបានផ្អាក បន្ទាប់ពីអ៊ីស្រាអែលនិងអាមេរិក បានវាយប្រហារទីតាំងនុយក្លេអ៊ែរអ៊ីរ៉ង់កាលពីខែមិថុនា។ លោក Araghchi បាននិយាយថា «អារម្មណ៍ប្រឆាំងការចរចាគឺខ្ពស់ខ្លាំង» ហើយ «មនុស្សជាច្រើនកំពុងប្រាប់ខ្ញុំថា កុំខ្ជះខ្ជាយពេលវេលារបស់អ្នកបន្ថែមទៀត កុំចាញ់បោកពួកគេ»។ លោកបានអះអាងថា ការវាយប្រហារនេះបានធ្វើឱ្យមានការមិនទុកចិត្តលើលោកប្រធានាធិបតី Donald Trump កាន់តែខ្លាំង។

លោកបាននិយាយថា ដើម្បីបន្តកិច្ចចរចាឡើងវិញ អ៊ីរ៉ង់ត្រូវការការធានាថា ខ្លួននឹងមិនត្រូវបានវាយប្រហារម្តងទៀតឡើយក្នុងអំឡុងពេលចរចា។ អាមេរិក កំពុងទាមទារឲ្យអ៊ីរ៉ង់បោះបង់ចោលកម្មវិធីចម្រាញ់សារធាតុអ៊ុយរ៉ានីញ៉ូម។ ក្រុមអ្នកសង្កេតការណ៍និយាយថា លក្ខខណ្ឌថ្មីរបស់អ៊ីរ៉ង់ អាចបង្កើតឧបសគ្គបន្ថែមទៀតសម្រាប់ការចាប់ផ្តើមកិច្ចចរចាឡើងវិញ។