អតីតប្រធានាធិបតីរុស្ស៊ី លោក Dmitry Medvedev កាលពីថ្ងៃព្រហស្បតិ៍ (ទី៣១ ខែកក្កដា) បានប្រាប់ប្រធានាធិបតីអាមេរិក លោក Donald Trump ឲ្យចងចាំថា ទីក្រុងមូស្គូមានសមត្ថភាពក្នុងការវាយប្រហារនុយក្លេអ៊ែរសម័យសូវៀត ជាមធ្យោបាយចុងក្រោយ បន្ទាប់ពីលោក Trump បានប្រាប់លោក Medvedev ឲ្យ «ប្រយ័ត្នប្រយែងពាក្យសម្ដីរបស់លោក»។

តាមរយៈការបង្ហោះនៅលើបណ្តាញសង្គម Truth របស់លោក កាលពីព្រឹកព្រលឹមថ្ងៃព្រហស្បតិ៍ លោក Trump បានជ្រើសរើសលោក Medvedev ដែលជាអនុប្រធានក្រុមប្រឹក្សាសន្តិសុខរបស់រុស្ស៊ី សម្រាប់ការរិះគន់យ៉ាងខ្លាំង បន្ទាប់ពីលោក Medvedev បាននិយាយថា ការគំរាមកំហែងរបស់លោក Trump ក្នុងការផ្ដល់ផលប៉ះពាល់យ៉ាងធ្ងន់ធ្ងរលើប្រទេសរុស្ស៊ី និងអ្នកទិញប្រេងរបស់ខ្លួន ជាមួយនឹងពន្ធកម្រិតពន្ធខ្ពស់ខ្លាំង គឺជា «ល្បែងនៃឱសានវាទ» និងជាជំហានខិតទៅជិតការមានសង្រ្គាម រវាងរុស្ស៊ី និងសហរដ្ឋអាមេរិក។

នៅក្នុងសារព្រមានលើកទី២ របស់លោកទៅកាន់សម្ព័ន្ធមិត្តជិតស្និទ្ធរបស់ប្រធានាធិបតីលោក Vladimir Putin ក្នុងប៉ុន្មានសប្តាហ៍ថ្មីៗនេះ លោក Trump បានសរសេរថា៖ «សូមប្រាប់ទៅលោក Medvedev ដែលជាអតីតប្រធានាធិបតីរុស្ស៊ីដ៏បរាជ័យ ដែលគិតថា លោកនៅតែជាប្រធានាធិបតី ឲ្យប្រយ័ត្នប្រយែងពាក្យសម្ដីរបស់លោក។ លោកកំពុងដើរចូលទៅក្នុងដែនដីដ៏គ្រោះថ្នាក់ខ្លាំងណាស់!»។

លោក Medvedev បានលើកឡើងថា សេចក្តីថ្លែងការណ៍របស់លោក Trump បានបង្ហាញថា រុស្ស៊ីគួរតែបន្តដំណើរឆ្ពោះទៅរកគោលនយោបាយបច្ចុប្បន្នរបស់ខ្លួន។ អំឡុងការបង្ហោះសារតាម Telegram លោក Medvedev បានប្រាប់ថា៖ «ប្រសិនបើពាក្យមួយចំនួនរបស់អតីតប្រធានាធិបតីរុស្ស៊ីបង្កឲ្យមានប្រតិកម្មភ័យព្រួយបែបនេះពីប្រធានាធិបតីដ៏ខ្ពង់ខ្ពស់របស់សហរដ្ឋអាមេរិកនោះ រុស្ស៊ីកំពុងធ្វើអ្វីៗយ៉ាងត្រឹមត្រូវ ហើយនឹងបន្តដំណើរទៅមុខតាមមាគ៌ារបស់ខ្លួន»៕