ចក្រភពអង់គ្លេស បានចាត់វិធានការការទូតដ៏សំខាន់មួយ ក្នុងសប្តាហ៍នេះ ដោយប្រកាសពីគោលបំណងរបស់ខ្លួន ក្នុងការទទួលស្គាល់ភាពជារដ្ឋរបស់ប៉ាឡេស្ទីន ប្រសិនបើអ៊ីស្រាអែល និងក្រុមហាម៉ាសមិនឈានដល់បទឈប់បាញ់ទេនោះ។ ហើយបើទោះបីជាប្រទេសលើពិភពលោកជាច្រើន នៅតែមិនទទួលស្គាល់អធិបតេយ្យភាពរបស់ប៉ាឡេស្ទីនក៏ដោយ ក៏បច្ចុប្បន្ននេះ មានប្រទេសចំនួន ១៤៧ ហើយ ដែលបានចាត់ទុកប៉ាឡេស្ទីនជារដ្ឋឯករាជ្យ ក្នុងនោះរួមទាំងមហាអំណាចសកលលោកមួយចំនួនផងដែរ។ 

សារព័ត៌មាន Washington Post បានឲ្យដឹងថា ប្រធានាធិបតីបារាំង លោក Emmanuel Macron បានប្រកាសថា ប្រទេសរបស់លោកនឹង «ទទួលស្គាល់រដ្ឋឯករាជ្យប៉ាឡេស្ទីន ក្នុងខែកញ្ញា នៅឯមហាសន្និបាតអង្គការសហប្រជាជាតិ»។ ការសម្រេចនេះនឹងធ្វើឲ្យបារាំងប្រហែលជាប្រទេសដែលគួរឲ្យកត់សម្គាល់បំផុតនៅលើពិភពលោក ក្នុងការទទួលស្គាល់ប៉ាឡេស្ទីន ព្រោះថា ប្រទេសបារាំងនឹងក្លាយជា «មហាអំណាចលោកខាងលិចធំបំផុត និងជាសមាជិកដំបូងនៃក្រុមប្រទេសទាំង៧ ឬ G7 ដែលទទួលស្គាល់រដ្ឋប៉ាឡេស្ទីន»។

ចំណែកប្រទេសន័រវែសបានទទួលស្គាល់ឯករាជ្យរបស់ប៉ាឡេស្ទីន ក្នុងឆ្នាំ២០២៤។ នាយករដ្ឋមន្ត្រីន័រវែស លោក Jonas Gare Store បានលើកឡើងថា ការចាត់វិធានការនេះ ដោយសារតែប្រទេសលោកមានអារម្មណ៍ថា ប៉ាឡេស្ទីនមាន «សិទ្ធិជាមូលដ្ឋាន និងឯករាជ្យក្នុងការសម្រេចចិត្តដោយខ្លួនឯង ហើយទាំងអ៊ីស្រាអែល និងប៉ាឡេស្ទីន មានសិទ្ធិរស់នៅក្នុងសន្តិភាព និងសន្តិសុខនៅក្នុងរដ្ឋរៀងៗខ្លួន»។ អេស្ប៉ាញបានទទួលស្គាល់ភាពជារដ្ឋរបស់ប៉ាឡេស្ទីនក្នុងពេលតែមួយជាមួយន័រវែស និងអៀរឡង់។ 

ប្រទេសម៉ិកស៊ិកបានទទួលស្គាល់រដ្ឋប៉ាឡេស្ទីន កាលពីខែមីនា បន្ទាប់ពីបានប្រកាសពីបំណងធ្វើដូច្នេះ កាលពីឆ្នាំមុន។ រដ្ឋាភិបាលម៉ិកស៊ិកបានបង្ហាញ «ការគាំទ្រយ៉ាងទូលំទូលាយ និងច្បាស់លាស់ ចំពោះដំណោះស្រាយរដ្ឋ២ សម្រាប់ជម្លោះនេះ»។ 

ប្រទេសប្រេស៊ីលបានទទួលស្គាល់រដ្ឋប៉ាឡេស្ទីនតាំងពីឆ្នាំ២០១០ ក្នុងអំឡុងពេលអាណត្តិដំបូងរបស់ប្រធានាធិបតីលោក Luiz Inácio Lula da Silva (លោក Lula)។ រីឯអាហ្រ្វិកខាងត្បូង បានទទួលស្គាល់ប៉ាឡេស្ទីនជារដ្ឋតាំងពីឆ្នាំ១៩៩៥ ដែលធ្វើឲ្យក្លាយជាប្រទេសដំបូងគេដែលសម្រេចបែបនេះ៕