ប្រធានាធិបតីលីបង់ Joseph Aoun ដែលថ្លែងទៅកាន់ក្រុមហេសបូឡា និងសម្ព័ន្ធមិត្តកាលពីថ្ងៃព្រហស្បតិ៍ បានអំពាវនាវឲ្យមានការវិលត្រឡប់ទៅរកភាពស្របច្បាប់របស់រដ្ឋ ជាមូលដ្ឋានគ្រឹះនៃភាពធន់របស់ប្រទេសនេះ។

ក្នុងសុន្ទរកថា លោក Aoun បានទាមទារឲ្យមានការរំសាយអាវុធរបស់ក្រុមហេសបូឡា និងការបន្តអំណាចរបស់រដ្ឋលីបង់ លើទឹកដីរបស់ខ្លួនទាំងមូល។

ថ្លែងទៅកាន់ក្រុមសកម្មប្រយុទ្ធនៅថ្ងៃប្រារព្ធទិវាកងទ័ព លោកបាននិយាយថា៖«ចំពោះអ្នកដែលបានប្រឈមមុខនឹងការឈ្លានពាន និងសហគមន៍ជាតិដ៏មានកិត្តិយសរបស់ពួកគេ ការពឹងផ្អែករបស់អ្នក គួរតែស្ថិតនៅលើរដ្ឋលីបង់តែប៉ុណ្ណោះ បើមិនដូច្នោះទេ ការលះបង់របស់អ្នក នឹងឥតប្រយោជន៍ ហើយរដ្ឋ ឬស្ថាប័នដែលនៅសល់ នឹងដួលរលំ។

ប្រធានាធិបតីលីបង់បានសង្កត់ធ្ងន់លើពេលវេលាមិនច្បាស់លាស់ ដែលប្រទេសនេះ កំពុងជួបប្រទះ ដោយពណ៌នាតំបន់នេះថា ត្រូវបានផ្អាកបណ្តោះអាសន្នរវាងភាពចលាចល និងឱកាស។

ប្រទេសលីបង់កំពុងប្រឈមនឹងវិបត្តិសេដ្ឋកិច្ចរយៈពេលជាច្រើនឆ្នាំ និងប្រព័ន្ធនយោបាយពាក់ព័ន្ធសាសនាដ៏ផុយស្រួយ ដែលបានបំផ្លាញសមត្ថភាពរបស់រដ្ឋ ក្នុងការអនុវត្តសិទ្ធិអំណាចរបស់ខ្លួន។

លោក Aoun បាននិយាយថា សម្រាប់ប្រទេសលីបង់ មានជម្រើស គឺរវាងការវិលត្រឡប់ទៅរកស្ថិរភាព ឬក៏ដួលរលំទាំងស្រុង។