រុស្ស៊ីនិយាយថា កងកម្លាំងរបស់ខ្លួនដណ្តើមបានការគ្រប់គ្រងទីក្រុងសំខាន់ Chasiv Yar ស្ថិតនៅភាគខាងកើតប្រទេសអ៊ុយក្រែន ក្រោយការប្រយុទ្ធគ្នាដ៏ខ្លាំងក្លាអស់រយៈពេលជិត ១៨ខែនៅតំបន់នោះ ។

យោធាអ៊ុយក្រែនបានបញ្ជាក់កាលពីថ្ងៃព្រហស្បតិ៍ថា កងកម្លាំងរុស្ស៊ី បានវាយប្រហារលើទីតាំងនៅជិតទីក្រុង Chasiv Yar ដែលស្ថិតនៅចម្ងាយជាច្រើនគ.មភាគខាងលិចទីក្រុង Bakhmut ប៉ុន្តែពួកគេច្រានចោលការបាត់បង់ទីក្រុងយុទ្ធសាស្រ្តមួយនេះ ។

ក្រសួងការពារជាតិរុស្ស៊ី បានចុះផ្សាយរូបភាពវីដេអូឃ្លីបរបស់យានដ្រូន ឃើញទាហានរបស់ពួកគេ ឈរជើងនៅតំបន់មួយចំនួនក្នុងទីក្រុង Chasiv Yar ហើយពួកគេនិយាយថា អគារ និងហេដ្ឋារចនាសម្ព័ន្ធជាង ៤.២០០ខ្នង ត្រូវបានបោសសម្អាត ក្នុងនោះទាហានអ៊ុយក្រែនប្រហែល ៥០នាក់ ត្រូវបានចាប់ធ្វើជាឈ្លើយសឹក ។

ទីក្រុង Chasiv Yar កាលពីមុនសង្រ្គាមមានពលរដ្ឋរស់នៅប្រហែល ១២.០០០នាក់ ប៉ុន្តែបច្ចុប្បន្នបានជាគំនរបាក់បែក ក្រោយការវាយប្រហារតាមច្រកអាកាស និងការផ្លោងគ្រាប់កាំភ្លើងធំអស់រយៈពេល ២ឆ្នាំ ។

កងកម្លាំងរុស្ស៊ី ចាប់ផ្តើមវាយប្រហារទីក្រុង Chasiv Yar កាលពីខែមេសា ឆ្នាំមុន ក្រោយរុញច្រានទាហានអ៊ុយក្រែនចេញពីទីក្រុង Bakhmut ។ ក្រុមអ្នកវិភាគ ធ្វើការប៉ាន់ប្រមាណថា ចាប់តាំងពីពេលនោះមក ពួកគេបាត់បង់កម្លាំងរាប់ពាន់នាក់ ពេលព្យាយាមយកឈ្នះការការពាររបស់អ៊ុយក្រែន ៕