បណ្តារដ្ឋអារ៉ាប់ និងរដ្ឋមូស្លីម រួមទាំងកាតា អារ៉ាប៊ីសាអ៊ូឌីត និងអេហ្ស៊ីប បានចេញនូវការអំពាវនាវលើកដំបូងរបស់ខ្លួន ឲ្យក្រុមហាម៉ាសរំសាយអាវុធ និងបោះបង់ចោលអំណាច នៅតំបន់ហ្កាហ្សាស្រ្ទីប ដែលជាផ្នែកមួយនៃកិច្ចខិតខំ ដើម្បីបញ្ចប់សង្រ្គាមនៅដែនដីបិទច្រកមួយនេះ ។

ក្រុមសម្ព័ន្ធអារ៉ាប់មានសមាជិក ២២រដ្ឋ សហភាពអឺរ៉ុប និងប្រទេស ១៧ផ្សេងទៀត គាំទ្រសេចក្តីប្រកាសចុះហត្ថលេខានៅកិច្ចប្រជុំអង្គការសហប្រជាជាតិ(UN) ដែលធ្វើសហម្ចាស់ផ្ទះដោយអារ៉ាប៊ីសាអ៊ូឌីត និងបារាំងកាលពីថ្ងៃអង្គារ ។

ជំនួបនៅបុរីញូវយ៉ក មានគោលដៅលើកឡើងពីដំណោះស្រាយសន្តិភាពលើសំនួរប៉ាឡេស្ទីន និងការអនុវត្តដំណោះស្រាយរដ្ឋ ២ ហើយនិងសេចក្តីប្រកាសលាតត្រដាងជំហានអ្វីខ្លះដែលប្រទេសម្ចាស់ហត្ថលេខីគិតគូរធ្វើបន្ទាប់ ។

សេចក្តីថ្លែងការណ៍រួមនិយាយថា អភិបាលកិច្ច ការពង្រឹងច្បាប់ និងសន្តិសុខទូទាំងដែនដីប៉ាឡេស្ទីន ត្រូវតែស្ថិតក្នុងដែនសមត្ថិកិច្ចប៉ាឡេស្ទីន ដោយមានការគាំទ្រអន្តរជាតិត្រឹមត្រូវ ហើយនៅក្នុងបរិបទបញ្ចប់សង្រ្គាម ក្រុមហាម៉ាស ត្រូវតែបញ្ចប់ការគ្រប់គ្រងរបស់ពួកគេនៅតំបន់ហ្កាហ្សា និងប្រគល់អាវុធជូនអាជ្ញាធរប៉ាឡេស្ទីន ដោយមានការចូលរួមគាំទ្រពីអន្តរជាតិ ស្របតាមគោលដៅអធិបតេយ្យភាព និងឯករាជ្យជាតិរដ្ឋប៉ាឡេស្ទីន ៕