បើតាមការអត្ថាធិប្បាយចេញផ្សាយដោយប្រព័ន្ធផ្សព្វផ្សាយរដ្ឋចិន People's Daily នៅថ្ងៃសុក្រ (ទី១ ខែសីហា) នេះ បានបង្ហាញថា ក្រុមហ៊ុន Nvidia ត្រូវតែមាន «ភស្តុតាងសុវត្ថិភាពដ៏គួរឲ្យជឿជាក់បាន» ដើម្បីលុបបំបាត់ក្ដីបារម្ភរបស់អ្នកប្រើប្រាស់ចិន ជុំវិញហានិភ័យសុវត្ថិភាព នៅក្នុងបន្ទះឈីបរបស់ក្រុមហ៊ុននេះ និងទទួលបានទំនុកចិត្តទីផ្សារឡើងវិញ។

ការអត្ថាធិប្បាយដែលមានចំណងជើងថា «Nvidia តើខ្ញុំអាចទុកចិត្តអ្នកដោយរបៀបណា?» ដែលត្រូវបានផ្សព្វផ្សាយនៅលើគណនីបណ្ដាញសង្គមរបស់សារព័ត៌មាននេះ បានលើកឡើងថា បណ្ដាក្រុមហ៊ុនបរទេសត្រូវតែគោរពតាមច្បាប់របស់ប្រទេសចិន ហើយយកសន្តិសុខជាកត្តាចាំបាច់មូលដ្ឋានជាមុន»។

នៅក្នុងសេចក្តីថ្លែងការណ៍មួយផ្ញើទៅកាន់សារព័ត៌មាន Reuters អ្នកនាំពាក្យរបស់ក្រុមហ៊ុន Nvidia បានរំលឹកឡើងវិញថា «សុវត្ថិភាពតាមប្រព័ន្ធអ៊ីនធឺណិតមានសារៈសំខាន់ណាស់ សម្រាប់យើង»។ អ្នកនាំពាក្យបានប្រាប់ថា៖ «ក្រុមហ៊ុន NVIDIA មិនមានកម្មវិធីសម្ងាត់នៅក្នុងបន្ទះឈីបរបស់យើងដែលនឹងផ្ដល់ឲ្យនរណាម្នាក់នូវវិធីពីចម្ងាយ ដើម្បីចូលទៅប្រើប្រាស់ ឬគ្រប់គ្រងឧបករណ៍ទាំងនោះឡើយ»។

ការអត្ថាធិប្បាយនេះបានលេចឡើង មួយថ្ងៃបន្ទាប់ពីទីក្រុងប៉េកាំង បានលើកឡើងពីការព្រួយបារម្ភ អំពីលទ្ធភាពនៃការមានហានិភ័យសុវត្ថិភាព នៅក្នុងបន្ទះឈីបបញ្ញាសិប្បនិម្មិត H20 របស់ក្រុមហ៊ុន Nvidia ដោយបង្កើតឲ្យមានភាពមិនច្បាស់លាស់ ជុំវិញការរំពឹងទុកនៃការលក់របស់ក្រុមហ៊ុន នៅក្នុងប្រទេសចិន ពោលគឺប៉ុន្មានសប្តាហ៍បន្ទាប់ពីការហាមឃាត់ការនាំចេញរបស់សហរដ្ឋអាមេរិកត្រូវបានផ្លាស់ប្តូរ៕