ប្រធានាធិបតីរុស្ស៊ី លោក Vladimir Putin បាននិយាយកាលពីថ្ងៃសុក្រ ទី១ សីហា ថា ទីក្រុងមូស្គូសង្ឃឹមសម្រាប់កិច្ចចរចាសន្តិភាពបន្ថែមទៀតជាមួយអ៊ុយក្រែន ប៉ុន្តែសន្ទុះនៃសង្រ្គាមគឺស្ថិតនៅលើការព្រមព្រៀងរបស់អ៊ុយក្រែន ខណៈបង្ហាញសញ្ញាពីការមិនផ្លាស់ប្តូរជំហររបស់លោក ទោះបីជាកាលបរិច្ឆេទកំណត់ទណ្ឌកម្មខិតជិតមកដល់របស់ទីក្រុងវ៉ាស៊ីនតោន ក៏ដោយ។

ប្រធានាធិបតីសហរដ្ឋអាមេរិក លោក ដូ Donald Trump និយាយថា លោកនឹងដាក់ទណ្ឌកម្មថ្មីលើទីក្រុងមូស្គូ និងប្រទេសដែលទិញការនាំចេញថាមពលពីរុស្ស៊ី មានប្រទេសធំៗដូចជាប្រទេសចិន និងឥណ្ឌា លុះត្រាតែរុស្ស៊ីមានចំណាត់ការនៅត្រឹមថ្ងៃទី៨ ខែសីហា ដើម្បីបញ្ចប់សង្រ្គាមរយៈពេលបីឆ្នាំកន្លះមកនេះ។

លោកបានសម្តែងការខកចិត្តចំពោះ លោក Putin ដោយបានចោទលោកពីបទ«ប្រើពាក្យសម្តីមិនសមហេតុផល» និងពណ៌នាការវាយប្រហារចុងក្រោយរបស់រុស្ស៊ីទៅលើអ៊ុយក្រែនថា «គួរឲ្យស្អប់ខ្ពើម»។

លោក Putin ដោយមិននិយាយសំដៅដល់ថ្ងៃផុតកំណត់របស់លោកTrump បាននិយាយថា កិច្ចចរចាសន្តិភាពចំនួនបីលើកជាមួយអ៊ុយក្រែនបានផ្តល់លទ្ធផលវិជ្ជមានមួយចំនួន ហើយរុស្ស៊ីរំពឹងថាការចរចានឹងបន្ត។